Kërcënimi me armë i gazetarëve në Nikël të Krujës, Begaj: Nuk duhet të tolerohet në shoqëri demokratike! Organet ligjzbatuese të ndjekin këtë rast dhune

Sekretari i Përgjithshëm i Partisë së Lirisë Tedi Blushi ka reaguar për dhunën ndaj gazetarëve duke fajësuar edhe në këtë rast kryeministrin Edi Rama. Sipas Blushit,  dhuna ndaj gazetarit të Report Tv Elvis Hila dhe atyre të “Fiks Fare” ndodh në regjimin e Edi Ramës pasi fjala e lirë është më e rrezikuar se kurrë.

Në një deklaratë për mediat, Blushi thotë se heshtja e qeverisë tregon se janë braktisur gazetarët që përballen me dhunë.

“Partia e Lirisë dënon me ashpërsinë më të madhe ngjarjet shumë të rënda kriminale të dhunimit, kërcënimit e goditjes me armë zjarri, si dhe të pengmarrjes të gazetarëve kurajozë të emisionit investigativ “Fiks Fare” në Krujë, si edhe rrahjen barbare të qendër të Lezhës të gazetarit njohur Elvis Hila nga persona të pamaskuar dhe të pamëshirshëm që nuk kursyen sulmin fizik as ndaj bashkëshortes së tij, e pranishme në vendngjarje.

Këto sulme të dënueshme ndaj fjalës së lirë janë vijim i revanshit të rrugaçërisë, dhunës, presionit, shantazhit dhe bullizmit konstant, që prej vitesh ushtrohet ndaj gazetarëve dhe mediave të pavarura në vend nga Edi Rama. Heshtja e Qeverisë, e Policisë së Shtetit dhe e institucioneve ligjzbatuese të kapura nga “Rilindja”, që i braktisën pa mbrojtje gazetarët për minuta të tëra në duart e krimit në Krujë dhe Lezhë, faktojnë se janë pikërisht ata frymëzuesit e dhunës ndaj medias. Në këtë regjim mafioz dhuna fizike dhe çnjerëzore, kërcënimet, shantazhet dhe presionet ndaj gazetarëve dhe mediave të pavarura janë kthyer në model”, tha Blushi.

Blushi nuk kurseu gjuhën e ashpër ndaj qeverisë duke thënë se Shqipëria shënon përkeqësim në Indeksin Botëror të Lirisë së Medias, për shkak të situatës dhe kërcënimet e vazhdueshme.

“Kryeministri Edi Rama dhe Ministri i Brendshëm Blendi Çuçi do të mbahen mend për rekordet më të zeza të sulmeve dhe kërcënimeve ndaj gazetarëve, edhe më shumë se në zonat e konflikteve të armatosura, ku reporterët merren peng dhe kërcënohen në mes të ditës në zemër të qyteteve të Shqipërisë dhe askush nuk i mbron, por as thotë edhe një fjalë për dënimin e autorëve.

Nuk është rastësi që vit pas viti Shqipëria shënon përkeqësim në Indeksin Botëror të Lirisë së Medias, si pasojë e situatës së përkeqësuar nga kërcënimet e pavarësisë editoriale, cenimin e integritetit fizik të gazetarëve nga krimi i organizuar dhe dështimin e shtetit shqiptar për t’i mbrojtur gazetarët edhe nga dhuna e pajustifikuar policore.

Duke theksuar se liria e medias është kusht i pazëvendësueshëm për garantimin e të drejtave të njeriut në një shoqëri demokratike, si edhe të llogaridhënies nga të gjitha institucionet publike, u bëjmë thirrje shoqatave të gazetarëve brenda e jashtë vendit të ngrihen në këmbë dhe të reagojnë fuqimisht ndaj këtyre akteve të barbarisë ndaj gazetarëve shqiptarë”, tha Blushi.

Blushi theksoi se pa gazetarë të lirë nuk ka demokraci, ndaj bëri thirrje që qytetarët t’i bashkohen në protestën e 11 shkurtit në mbrojtje të fjalës së lirë.