TIRANË - Një 20-vjeçar është arrestuar nga policia pasi në një rrjet social hapte profile false dhe, gjatë komunikimit me persona të ndryshëm, siguronte prej tyre foto personale, me të cilat i shantazhonte duke u kërkuar para në këmbim të mospublikimit të tyre.

Konkretisht, në datat 05.12.2025 dhe 06.12.2025, 20-vjeçari Erjon Mejdani, në mënyrë të përsëritur, ka përfituar shumën 750 euro nga një 36-vjeçar.

Njoftimi i policisë:

Seksioni për Hetimin e Krimeve Kibernetike, në bashkëpunim me Forcën e Posaçme Operacionale të DVP Tiranë, në vijim të punës për goditjen e paligjshmërive në fushën kibernetike, organizuan dhe finalizuan operacionin policor të koduar “Online Threat”.

Si rezultat i operacionit u arrestua shtetasi E. M., 20 vjeç, banues në Tiranë.

Nga veprimet hetimore ka rezultuar se ky shtetas, për një periudhë rreth 2-javore, në një rrjet social hapte profile false dhe, gjatë komunikimit me shtetas të ndryshëm, siguronte prej tyre foto personale. Më pas, nëpërmjet mashtrimit dhe shantazhit, u kërkonte shuma monetare nga 500 deri në 1000 euro, në këmbim të mosbërjes publike të fotove personale.

Konkretisht, në datat 05.12.2025 dhe 06.12.2025, ky shtetas, në mënyrë të përsëritur, ka përfituar shumën 750 euro nga një 36-vjeçar.

Materialet procedurale i janë referuar Prokurorisë së Tiranës, për veprime të mëtejshme.