Meta: Kishte frymë uniteti! Tre çështjet që diskutuam me Ramën, Bashën, Ruçin e ministrat

Presidenti Ilir Meta e cilëson si konstruktive dhe me frymë uniteti mbledhjen online (me video-konference) të Këshillit të Sigurisë Kombëtare që u zhvillua mesditën e sotme. Në mbledhjen ku morën pjesë Kryetari i Kuvendit Gramoz Ruçi, kryeministri Edi Rama, ministrat përgjegjës si edhe kryetari i Partisë Demokratike Lulzim Basha, thotë se u diskutuan masat që janë marrë dhe po merren nga qeveria për përballimin e situatës në vend dhe parandalimin e përhapjes së mëtejshme të pasojave të COVID-19, përballimi i situatës ekonomike dhe masat e marra për rikthimin e shqiptarëve, të cilët kjo situatë i ka gjetur jashtë territorit.

Kryeministri Rama dhe anëtarët e qeverisë, sipas zyrës së shtypit të Presidencës e informuan Ilir Metën për masat e marra dhe për skenarët që do të duhet të përballohen në varësi të zhvillimit të situatës. Kryetari i Kuvendit, sipas Presidencës, shprehu gatishmërinë për përmbushjen e detyrimeve të Kuvendit në këtë situatë. Ndërsa Lulzim Basha shprehu pikëpamjet dhe sugjerimet e opozitës për të përballuar këtë pandemi.

Kreu i shtetit deklaron se mbledhja e Këshillit të Sigurisë Kombëtare u zhvillua në një frymë tepër konstruktive dhe bashkëpunuese dhe pati si qëllim kryesor unifikimin e të gjitha energjive dhe kapaciteteve njerëzore, mjekësore e shkencore për të përballuar me efikasitet të plotë këtë situatë të vështirë në funksion të mbrojtjes së shëndetit të çdo qytetari, ekonomisë kombëtare, paqes sociale dhe sigurisë. Presidenti Meta shprehu besimin se në këtë frymë uniteti, gjithëpërfshirjeje dhe bashkëpunimi, vendi do ta përballojë me sukses këtë situatë të vështirë, jo vetëm për Shqipërinë, por për mbarë botën, në interesin me të mirë të çdo qytetari të Republikës së Shqipërisë.

Lajmi kryesor:

COVID-19/ Tre orë mbledhje e 'Sigurisë' online! Meta: Kishte unitet! Tre çështjet që diskutuam me Ramën, Bashën, Ruçin e ministrat

TAG:
• Ilir Meta
• keshilli i sigurise kombetare
• Koronavirus
• koronavirusi ne shqiperi