Dy tornado shkaktuan dëme të mëdha në provincën Hubei në Kinën qendrore, me të paktën 8 viktima, njoftuan të martën mediat shtetërore. Erërat, që arritën shpejtësinë deri në 149 kilometra në orë, përmbysën automjete dhe flakën çatitë e ndërtesave, duke lënë pas gjurmë të mëdha shkatërrimi.

Gjatë katër orëve, erëra me forcë të nivelit 13 sipas shkallës Beaufort përfshinë mbrëmjen e së hënës qytetet Huangshi, Huanggang, Ezhou dhe Xianning, raportoi agjencia shtetërore Xinhua. Sipas raportit, të paktën një person rezulton ende i zhdukur.

Vendi ka shpallur gjendjen e jashtëzakonshme.

Tornadot janë jashtëzakonisht të rralla në Hubei, një nga qendrat kryesore industriale të prodhimit të automjeteve dhe teknologjisë në Kinë. Wang Xiaoling, eksperte pranë Byrosë Meteorologjike të provincës, deklaroi për gazetën Hubei Daily se tornadoja e fundit në këtë provincë ishte regjistruar në maj të vitit 2021.

Kina, ekonomia e dytë më e madhe në botë, po përballet gjithnjë e më shumë me fenomene ekstreme të motit, të cilat ekspertët i lidhin me ndryshimet klimatike. Reshjet e fuqishme, temperaturat përvëluese të verës dhe erërat e forta shkaktojnë çdo vit humbje ekonomike me vlerë dhjetëra miliarda dollarë, duke ndërprerë aktivitetin industrial dhe duke shkatërruar të mbjellat.

Pamjet e transmetuara nga televizioni shtetëror treguan ekipet e shpëtimit në Huanggang pranë një kamioni të shkatërruar, që dukej sikur ishte copëtuar nga llamarina të shkëputura nga çatia e një ndërtese aty pranë. Një tjetër video tregonte një automjet të bardhë të përplasur pas një shtylle ndriçimi, i rrethuar nga copa të përthyera metali.

Qendra Kombëtare Meteorologjike e Kinës paralajmëroi se verilindja e Hubeit duhet të përgatitet për reshje të dendura deri në shumë intensive edhe gjatë së martës. Reshje të ngjashme priten edhe në rajonin Guangxi, si dhe në provincat Guangdong, Hainan, Jilin, Shandong dhe Liaoning.

Rajoni Guangxi, ende i goditur nga pasojat e tajfunit Maysak, i cili gjatë ditëve të fundit shkaktoi të paktën katër viktima në Nanning, duhet të përgatitet për reshje deri në 260 milimetra brenda 24 orëve, të cilat mund të shkaktojnë rrëshqitje dheu.

Diga e një rezervuari në Nanning u shemb, duke lëshuar një rrjedhë të fuqishme uji pasi lumenjtë dolën nga shtrati si pasojë e kalimit të tajfunit.

Ndërkohë, 16 persona rezultojnë ende të zhdukur pas një rrëshqitjeje masive dheu në një qark malor të provincës Gansu, në perëndim të Kinës. Mediat shtetërore raportojnë se gjithsej 33 persona u morën nga rrjedha e dheut në orët e para të mëngjesit.

Presidenti kinez Xi Jinping bëri thirrje për “përpjekje maksimale” për shpëtimin e të prekurve nga përmbytjet.

Përveç kësaj, Kina po përgatitet edhe për mbërritjen e supertajfunit Bavi, i cili po lëviz nëpër Oqeanin Paqësor drejt Tajvanit dhe pritet të godasë bregdetin lindor të Kinës më vonë gjatë kësaj jave. Stuhia regjistroi erëra me shpejtësi deri në 290 kilometra në orë, ndërsa kaloi të hënën mbi ishujt Guam, Tinian, Saipan dhe Rota.