KKRT ndalon reklamën "Shoku i Çimit"
ka veprime të dhunshme

TIRANE- Këshilli i Kombëtar i Radio Televizionit urdhëron operatorët radio- televizivë ndërprerjen e menjëhershme të transmetimit të reklamës për internetin 3G, të kompanisë celulare AMC, apo të njohur për publikun shqiptar si “shoku i Çimit”. Sipas KKRT-së në reklamë ka veprime të dhunshme që mund të çojnë në nxitjen e dhunës, veçanërisht te fëmijët dhe moshat e reja.

Këshilli i Kombëtar i Radio Televizionit kishte nisur vizionimin e kësaj reklame nisur nga rekomandimi i Komisionit të Mbrojtjes së Konsumatorit, dhe mbështetur në detyrat fuksionale të parashikuara në ligj.

Reklama që kishte të bënte me internetin 3G prej disa ditësh ishte në transmetim nga disa operatorë televizivë, të cilët nga data 2 shkurt u është kërkuar të ndërpresin në mënyrë të menjëhershme ndërprerjen e transmetimit.

“Këshilli i Etikës pranë KKRT-së, pas shqyrtimit të detajuar të pamjeve dhe tekstit të reklamës, arriti në përfundimin se në përmbajtjen dhe mesazhin e kësaj reklame teprohet me një lojë të detyruar, me veprime dhune, që mund të çojë në nxitjen e akteve e veprimeve të dhunshme te teleshikuesit, veçanërisht te fëmijët dhe moshat e reja”- nënvizon KKRT.

Sipas organit që merret me rregullimin dhe mbikëqyrjen e veprimtarisë radiotelevizive në Republikën e Shqipërisë reklama “nuk respekton dispozitat e ligjit nr. 8410, dt. 30. 09. 1998, “Për Radion dhe Televizionin publik e privat në Republikën e Shqipërisë”, i ndryshuar, neni 55 pika 2, ku përcaktohet se: “Nuk lejohet të transmetohen në radio dhe televizion reklamat që nxisin... dhunën”, si dhe neni 56, paragrafi 1, ku ndalohen reklamat “ ...që nxisin sjellje, të cilat rrezikojnë shëndetin dhe zhvillimin normal psikik të fëmijëve."- thuhet në njoftimin për shtyp të KKRT.
(sg/shqiptarja.com)