Klosi: Greqia këmbëngul
për kufirin, këtu ka pisllëk

TIRANE- Ish-kreu i Shërbimit Informativ Shtetëror Fatos Klosi në një intervistë telefonike me gazetën “Shqiptarja.com” është shprehur se këmbëngulja e qeverisë greke për të qëndruar e pandryshuar marrëveshja për kufirin detar mes Shqipërisë dhe Greqisë dhe e hedhur poshtë nga Gjykata Kushtetuese shqiptare tregon se ka një pisllëk të madh. Klosi ka folur dhe për përgjimet që i janë bërë nga shërbimi sekret politikës e trupit diplomatik duke thënë se janë përtej kuadratit ligjor e se përgjegjësit duhet të dalin para drejtësisë, ndërsa duhet reformë e thellë.
 
Jemi tek siguria kombëtare, disa ditë më parë numri dy i qeverisë greke Venizellos ka deklaruar se kërkon respektimin pa ndryshime të marrëveshjes së detit, nënshkruar nga Basha-Bakojani që u hodh poshtë nga Gjykata Kushtetuese, në mënyrë që mbështetje për në BE të vijojë. Komenti juaj?

Një deklaratë e tillë, që ka në bazë qëndrimin se marrëveshja e nënshkruar dhe e hedhur poshtë nga Gjykata Kushtetuese shqiptare duhet të mos ndryshojë, tregon se ajo marrëveshje ka mbrojtur interesat antishqiptare të Greqisë dhe aspak interesat e shtetit shqiptar. Ajo mund të them është se kjo është vërtetë rënduese si për palën shqiptare që mori pjesë në këto negociata dhe ishte palë në marrëveshjen e nënshkruar në vitin 2009 ashtu dhe për palën greke që ishte imponuese për këtë cënim të interesit dhe integritetit të një vendi tjetër dhe aq më tepër të një vendi fqinj me të cilin kërkon bashkëpunim dhe fqinjësi të mirë.
 
Por Greqia këmbëngul për mosndryshim të marrëveshjes...?
Përderisa ngulin këmbë aq shumë që të mos ndryshohet marrëveshja e nënshkruar kohë më parë për kufirin detar, megjithëse ka një vendim të Gykatës Kushtetueses që e ka rrëzuar një gjë të tillë,  tregon se ka një pisllëk të madh në këtë marrëveshje dhe kjo duhet të na bëjë të kujdesshëm në të ardhmen.
 
Pse gjithë kjo ngutje nga ana e Greqisë...?
Greqia ka afër 92 përqind të kufirin të saj detar të papërcaktuar ende me fqinjët. Ta rregullojë njëherë kufirin detar me Turqinë, shtet fqinj me të cilin ka afër 92 përqind të kufirit detar dhe pastaj të vijë tek Shqipëria për të rregulluar kufirin detar, ku me ne ka vetëm 8 deri në 10 përqind të kufirit detar në tërësi.

Greqia po shfrytëzon rastin në këtë moment, po bën me Shqipërinë atë që ka bërë me Maqedoninë për disa vite duke e bllokuar për emrin si kusht për mbështetjen për anëtarësim në BE. Greqia po shfrytëzon dëshirën tonë për integrim në BE dhe bën gjëra të tilla, duke vënë kushte për mbështetjen për statusin. Për mua të gjitha këto veprime nuk janë të ndershme.
 
Akuzat në drejtim të ish-ministrit të Mbrojtjes Arben Imami se ka përgjuar opozitën dhe trupin diplomatik përmes SHIU-t por dhe familjeve të të vrarëve nga Dajti vijojnë. Komenti juaj...?
Shërbimi Sekret i Ushtrisë nuk ka pse të përgjojë qytetarët, politikën dhe diplomatët e huaj brenda vendit, pasi nuk është pjesë e punës së tij, sipas ligjeve në fuqi dhe Kushtetutës. Aq më tepër që Shërbimi Sekret i Ushtrisë është i përcaktuar për detyra të tjera, dhe për më tepër i kuadruar nga anëtarësimi i Shqipërisë në NATO dhe veprimtaria brenda këtij kuadri.
 
Por në favor të këtij shërbimi inteligjet janë vënë pajisje përgjimi, të blera shumë shtrenjtë...?
Prandaj unë them që është e pamotivueshme ligjërisht blerja dhe përdorimi i atyre aparaturave përgjimi, dhe për më tepër pajisjeve të shtrenjta të panevojshme për shërbimin sekret të ushtrisë, që nuk bëjnë pjesë në axhendën e punës së tij. Çfarëdo pune të ketë bërë Shërbimi Sekret i Ushtrisë, përgjim politikanësh, ambasadorësh dhe njerëzve të tjerë me ato pajisje do të jetë jo ligjore dhe aspak korrekte. Për familjet e viktimave të vrara, siç përmendet ju atë të familjeve të të vrarëve nga Dritan Dajti, është policia kriminale ajo që merret me to, pasi me krimin merret policia kriminale dhe jo Shërbimi Sekret Ushtarak.
 
Duke parë se ka pasur akuza konkrete, mendoni se dikush duhet të vihet para drejtësisë...?
Unë e di që po bëhet një organizim në këtë fushë, dhe do të kryhet një reformë e thellë dhe në këtë sektor. Mendoj se ka nevojë për një sërë reformash në mënyrë që të ngrihet në një stad më të avancuar shërbimi inteligjent, për të marrë përsipër kryerjen me efikasitet detyrën sipas ligjit e Kushtetutës, pa ndërhyrë në sektorë të tjerë ku nuk i takon. Përsa i përket shekljes së ligjit, unë mendoj se për çdo shkelje ligji duhet të mbahet përgjegjësi dhe abuzuesit të dalin para ligjit, pasi nuk duhet të përsëriten më veprime të tilla që cënojnë ligjin dhe jetën e qytetarëve shqiptarë, sikurse ka ndodhur më parë.

TURQIA

“Greqia ka afër 92% të kufirin të saj detar të papërcaktuar ende me fqinjët. Ta rregullojë njëherë kufirin detar me Turqinë, shtet fqinj me të cilin ka afër 92 përqind të kufirit detar dhe pastaj të vijë tek Shqipëria për të rregulluar kufirin detar, ku me ne ka vetëm 8 deri në 10 përqind të kufirit detar në tërësi”.

Shkrimi u publikua sot (27.10.2013) në gazetën Shqiptarja.com (print)

Redaksia Online
(d.d/shqiptarja.com)

TAG:
• dritan dajti