Këtë fakt e ka bërë të ditur vetë ministri Klosi, gjatë një postimi në faqen e tij në rrjetin social facebook, ku dhe thekson se marrëveshja në fjalë do të shtrihet në angazhime konkrete përgjatë dy viteve të ardhshme.
“Takova sot në Sofje, zëvendëskryeministrin, njëkohësisht ministër i Punës dhe Politikave Sociale, z. Ivailo Kalfin, me të cilin nënshkruam Marrëveshjen e Programit të Bashkëpunimit 2016-2017. Gjithashtu biseduam rreth mundësive të bashkëpunimit në fusha të tilla, siç janë: përfshirja sociale, punësimi, shkollat dhe qendrat profesionale, si dhe sigurimet shoqërore”, - shprehet Klosi.
Më tej ai bën të ditur se gjatë këtij takimi, një vend të veçantë zunë marrëdhëniet mes dy vendeve tona, si dhe bashkëpunimi që mund të vijë edhe në kuadër të procesit të integrimit në BE. “Për më tepër, në këtë takim u diskutua rreth mundësive të bashkëpunimit për projekte të përbashkëta mes Bullgarisë, si vend anëtar i BE-së dhe Shqipërisë, si vend kandidat për të hyrë në BE, në fushat e interesit të përbashkët”, - shprehet Klosi në statusin e tij.
Ai shton gjithashtu se ministri bullgar, Kalfin, nga ana e tij theksoi vullnetin e qeverisë bullgare për mbështetjen dhe asistencën ndaj vendit tonë në rrugën e integrimit europian.