Koka në rajonin e Lombardisë: Mirëpresim shtrirjen e investimeve

TIRANË, 11 Korrik/ATSH-Almarina Gegvataj/- Bashkëpunimi dhe shtrirja e investimeve në fushën e mjedisit, ishte në fokus të takimeve, në kuadër të vizitës zyrtare që ministri i Mjedisit Lefter Koka, zhvilloi në rajonin e Lombardisë, në Itali.
Gjatë kësaj vizite, ministri ka ftuar investitorët italianë të investojnë në vendin tonë.
Duke e cilësuar rajonin e Lombardisë si një nga më të zhvilluarit në Itali, Koka kërkoi bashkëpunim mes dy vendeve dhe tha se qeveria shqiptare i mirëpret në "klimë të re besimi dhe serioziteti".
Ministri Koka u prit në takim nga Roberto Mura, President të Qendrës Riccagioia, Prefektja e Rajonit të Lombardisë, Peg Strano Materia, përfaqësues të institucioneve lokale të Rajonit të Lombardisë, si dhe një sërë sipërmarrësish italianë në fushën e mjedisit, pyjeve, menaxhimit të mbetjeve.
Të pranishëm gjatë takimit kanë qenë përfaqësues të rajonit të Lombardisë, Presidenti i Provincës Pavia, Këshilltarë të Bujqësisë dhe Mjedisit të Rajonit dhe Provincave, autoritete lokale dhe një grup sipërmarrësish e përfaqësuesish të sindikatave të zonës.
"Gjatë takimit, biseduam për forcimin e bashkëpunimit ndërmjet dy vendeve tona në fushën e mjedisit. I ftova investitorët italianë të shtrijnë investimet e tyre në fusha të tilla si menaxhimi i integruar i mbetjeve, administrimi i ujërave, rritja e sipërfaqeve pyjore nëpërmjet pyllëzimeve të reja dhe rehabilitimeve të sipërfaqeve të dëmtuara dhe degraduara dhe zhvillimi i sistemit të IT për menaxhimin e mjedisit", ka deklaruar Ministri.
Ai i ka siguruar investitorët që qeveria shqiptare i mirëpret në një klimë të re besimi dhe serioziteti.
Gjithashtu, Ministri Koka vizitoi një nga qendrat kërkimore më të njohura të verës, ku u njoha me me studimet dhe teknologjinë e fjalës së fundit të përdorur për prodhimet bio./a.g/