Sheshi ‘Skënderbej’ mbushet plot për koncertin e madh! Mesazhi i Ramës: Shqipëria e ka vendin nën qiellin e Europës së Bashkuar (VIDEO)

Presidenti Bajram Begaj ka përgatitur një video-mesazh për qytetarët shqiptarë që janë mbledhur në shesh për të ndjekur koncertin e madh që u organizua për rastin e 100-vjetorit të marrëdhënieve SHBA-Shqipëri dhe për çeljen e negociatave. Begaj tha se është i bindur që do të kemi shumë vështirësi, por vetëm falë punës do arrijmë t'i përballojmë dhe të zhvillojmë vendin tonë.

"E sotmja është një mbrëmje feste, pasi rikonfirmojmë rrugën e pakthyeshme evropiane dhe partneritetin me aleatin tonë prej një shekulli.
Jam i vetëdijshëm se 10 ditë më parë, me vendimin për hapjen e negociatave për anëtarësim në Bashkimin Evropian, në rrugën që kemi zgjedhur, në rrugën e bashkimit në një federatë popujsh e kombesh që u krijua si bashkim vullnetesh - e vetmja në histori deri më sot - do të ketë ndryshime jo vetëm në rrafshin politik e shtetëror, por edhe në koncepte të tilla themelore si pavarësia e identiteti.

Duke promovuar identitetin tonë kombëtar, faktorin më të rëndësishëm historik e kulturor, që nuk njeh kufij dhe nuk ka pengesë për t’u lartësuar, shqiptarët do të jenë qytetarë dhënës në qytetërimin europian. Jam i vetëdijshëm për përgjegjësitë, dhe më shumë akoma, jam i vetëdijshëm për vështirësitë që do të na duhet të përballojmë. Por, nëse punojmë të gjithë duke patur në mendje dhe në zemër Shqipërinë, interesin kombëtar dhe të ardhmen e fëmijëve tanë e të brezave të tjerë që do të vijnë, jam i bindur, se jo vetëm vështirësitë do t’i përballojmë, por atdheu ynë do të përparojë e zhvillohet.

28 korriku është një datë shumë e rëndësishme edhe për popullin shqiptar dhe atë amerikan, si dy popuj që i bashkojnë vlerat, parimet. Në 100 vite, SHBA kanë qenë aty për ne, duke mbështetur cdo hap të Shqipërisë drejt transformimit demokratik dhe drejt rrugëtimit drejt anëtarësimit në Bashkimin Evropian. Nën modelin e demokracisë amerikane dhe unitetin e familjes evropiane, Shqipëria ka nevojë për përkushtimin tonë, ka nevojë për ndershmërinë tonë, ka nevojë për punën dhe besimin e të gjithëve ne, ka nevojë për dashurinë tonë. Është koha t’ia japim ato pa asnjë rezervë, pa u lodhur, por me devocion e përkushtim", tha Begaj.

Kryeministri Edi Rama ka ndarë një mesazh për qytetarët nga sheshi 'Skënderbej' ku po bëhet festa e madhe në kuadër të 100 vjetorit të marrëdhënieve SHBA-Shqipëri dhe çeljen e negociatave me BE.  "Ne kemi fatin dhe mundësinë të jetojmë në të përpjetën drejt majës ku Shqipëria e ka vendin e saj natyral, nën qiellin e Europës së Bashkuar", ishte video-mesazhi i kryeministrit Edi Rama, i cilipërmendi rrugën e vështirë dhe të lodhshme që pati Shqipëria deri në mbajtjen e Konferencës së parë Ndërqeveritare duke thënë se nga vendi më i varfër, arriti të zhvillohej e të fitonte respekt në arenën ndërkombëtare. K

ryeministri u ndal edhe komentet për protestat e opozitës që brohorisnin "E duam Shqipërinë si gjithë Europa!" duke thënë se patën ndikim në këtë rrugë së bashku me ata që punuan me durim të madh që Shqipëria të arrinte aty ku është sot. Një mesazh e kishte edhe presidenti Bajram Begaj, i cili tha se është i bindur që do të kemi shumë vështirësi, por vetëm falë punës do arrijmë t'i përballojmë dhe të zhvillojmë vendin tonë.

“Çfarë dite! Çfarë mbrëmje!

Një shekull më parë, në 28 korrik të vitit 1922, Shqipëria u lidh me Shtetet e Bashkuara, nëntë ditë më parë rruga e Shqipërisë u lidh zyrtarisht, pa kthim, me atë të Europës së mohuar me shekuj!

Imagjinojeni vetëm për një çast motra dhe vëllezër, vetëm për një çast: As prindërit tanë, as gjyshërit tanë, as stërgjyshërit e katragjyshërit tanë, asnjëherë shqiptarët përpara nesh nuk e patën fatin dhe mundësinë tonë! Fatin dhe mundësinë e zgjedhjes së lirë të destinacionit të tyre, edhe pse, qysh prej Gjergj Kastriotit ëndrra e vrarë, e plagosur, e dhunuar, e mohuar, e të tërë brezave para nesh vinte nga dielli që lind andej nga perëndon! Ata mbijetuan në tatëpjetat e perandorive dhe regjimeve që nuk i zgjodhën vetë, ndërsa ne kemi fatin dhe mundësinë të jetojmë në të përpjetën drejt majës ku Shqipëria e ka vendin e saj natyral, nën qiellin e Europës së Bashkuar.

Nisja zyrtare e negociatave për anëtarësimin në Bashkimin Europian është vetëm fundi i fillimit të një rruge tejet sfiduese, por të duhur, të lodhshme, por të bukur, të gjatë, por aspak të vetmuar. Nga vendi më i vetmuar, më i prapambetur, me i varfër i kontinentit, ne sot, jemi jo ku e ku më të zhvilluar e më pak të varfër se sa vetëm tre dekada më parë, po jemi më shumë se asnjëherë më parë në këto tre dekada, të mbrojtur nga çdo rrezik, në mes të dy aleatëve tanë të mëdhenj strategjike, SHBA e BE, dhe të respektuar nga çdokush në arenën ndërkombëtare, si një vend i vogël, por me karakter dhe dinjitet.

Shqipëria në krye të OSBE, Shqipëria në Këshillin e Sigurimit të Kombeve të Bashkuara, Shqipëria ne tryezën e negociatave për anëtarësim, Shqipëria bazë ajrorë dhe së shpejti edhe bazë detare e NATO-s, Shqipëria në krye të procesit të transformimit të rajonit nga një zonë lufte e konfliktesh, në një zone paqeje e zhvillimi ekonomik, të gjitha këto zhvillime të këtyre viteve më të fundit, që jo prindërit e gjyshërit tanë, po as shumëkush prej nesh as që i imagjinonte dot deri para disa vitesh, kur Shqipëria kishte humbur busullën dhe çdo dinjitet ndërkombëtar!

Po sigurisht, në rrugën për të ardhur deri këtu, përveç rolit tonë vendimtar në këto vite, ka pasur edhe plot kontributorë të tjerë, duke nisur nga ata që dolën në rrugë me thirrjen, "E duam Shqipërinë si gjithë Europa!", deri tek çdokush që e vendosi një gur në këtë mur që kemi ngritur gjer më sot me mund e me durim të madh e mbi të gjitha me vizion të qartë për Shqipërinë. Por lartësia ku e kemi ngjitur sot Shqipërinë, na tregon edhe se sa poshtë ishim kur u nisëm, po edhe se sa rrugë e përpjekje ka akoma për të arritur majën e ëndërruar për 500 vjet me radhë.

Kini besim! Kini besim motra e vëllezër se ajo majë do të jetë e jona, sepse e jona është barra që historia na caktoi për ta ngjitur flamurin e Skënderbeut e të Ismail Qemalit në atë majë, i yni është misioni i garantimit të pakthyeshmërisë së rrugës së modernizimit të Shqipërisë, tonat janë edhe dhimbjet e kësaj të përpjete, ku rrëshqitjet e rrëzimet janë të pashmangshme, po ku i pashmangshëm është edhe triumfi i drejtësisë!

Ndjehuni mirë sonte, ndjehuni mirë çdo ditë më tutje, sepse më e fortë Shqipëria s'ka qenë kurrë, më të fortë se sot shqiptarët në Shqipëri e në këtë rajon s’kanë qenë kurrë, falë pa diskutim edhe dy kokave të shqiponjës së miqësive tona, Shteteve të Bashkuara dhe Bashkimit Europian. Ndjehuni të sigurt në të ardhmen dhe të motivuar të punojmë çdo ditë e më shumë që ajo të bëhet sa më parë e sotmja e Shqipërisë së fëmijëve tanë! Dhe mbi të gjitha ndjehuni krenarë për Shqipërinë dhe për flamurin më të bukur në botë, sepse sot flamuri ynë është në mes dy të tjerëve, që janë mishërimi i lirisë, i demokracisë dhe i fuqisë për të shkuar çdo ditë të sigurt përpara!

Zoti i bekoftë këta flamuj!

Zoti e bekoftë Shqipërinë dhe shqiptarët kudo janë! ", ishte videomesazhi i Ramës.

Në koncertin e madh që po mbahet në Tiranë në kuadër të 100-vjetorit të marrëdhënieve SHBA-Shqipëri dhe çeljes së negociatave janë të pranishëm qindra qytetarë. Ndërkohë ka mbërritur edhe ambasadorja Yuri Kim së bashku me kryetaren e Kuvendit Lindita Nikolla, kryeministrin Edi Rama, ministret Elisa Spiropali e Olta Xhaçka. Një moment, kamera është fiksuar tek kryeministri Edi Rama që përqafon kreu e grupit parlamentar të PS, Taulant Ballën.

Socialistët janë në festë. Aty ka mbërritur edhe kryeministri Edi Rama i shoqëruar nga Linda Rama ndërsa në sfond ishte kënga e Flori Mumajesit me titullin “Nallane 2” që në tekst ka frazën ‘A e mban mend kur ishim bashkë?’. Mesa duket ka qenë rastësi që kjo këngë po performohej në skenë kur mbërriti Rama.

Taulant Balla ka mbërritur në koncertin e organizuar nga Edi Rama në sheshin Skënderbej. Në fjalën e tij për Report Tv, Balla tha se kjo është festë e madhe pasi sheshi mbushet plot. Një koment e kishte edhe për opozitën duke thënë se kanë hall të madh.

“Këtë vit para pak ditësh filluam bisedimet për anëtarësim në familjen europiane. Sot i bëjmë të dyja së bashku, 100-vjetorin e marrëdhënieve Shqipëri-SHBA dhe çeljen e negociatave. Kjo është festë e organizuar nga kryeministri Edi Rama dhe besoj që sipas zakonit, mikpritësi është Edi Rama bashkë me Bashkinë e Tiranës. Festa është shumë e bukur.

Pas 31 viteve të mbërritjes së James Backer, sheshi Skënderbej mbushet sërish për të festuar 100 vjetorin dhe çeljen e negociatave. Opozita ka hall të madh, kur s’e fton thotë pse s’më ftove, kur e fton thotë pse më ftove”, tha Taulant Balla.

Këngëtarja e njohur Marsela Cibukaj ka folur për koncertin që do të mbahet në sheshin Skënderbej për 100-vjetorin e marrëdhënieve Shqipëri-SHBA dhe celjen e negociatave në BE. Në një intervistë për “Studio Live” nga Arbër Hitaj dha detajet duke thënë se do të perfomojë hitet e saj por do të sjellë edhe këngët e Vace Zelës.

“Do të performoj diçka tepër të veçantë ,te, do të sjellë një nga këngët te kënduara më parë nga Vaçe Zela , si dhe këngë të tjera nga repertori im, do të ketë surpriza! Vetëm pas pak shihemi aty, të gjithë duhet të jenë aty.