TIRANË - Kontrabanda e mallrave me akcizë, ka çuar në pranga drejtorin e Policisë së Kufirit në Korçë, Ylber Zyberi. Ministria e Brendshme, ka bërë të ditur se, është “arrestuar në flagrancë drejtori i Drejtorisë Rajonale për Kufirin dhe Migracionin në Qarkun e Korçës dhe shpallen në kërkim disa persona që dyshohet se ishin pjesë e një grupi kriminal që kryente kontrabandë të mallrave industrialë dhe aty me akcizë”.
 
Sipas ministrisë, sot, “u bë arrestimi në flagrancë i Ylber Zyberi, 41 vjeç, lindur dhe banues në Kukës, me detyrë drejtor i Drejtorisë Rajonale për Kufirin dhe Migracionin në qarkun e Korçës, i dyshuar se ka konsumuar veprat penale të “korrupsionit pasiv të personave që ushtrojnë funksione publike”, “kontrabandës me mallra të tjera”, dhe “shpërdorimit të detyrës” në bashkepunim”.

Hetimit ndaj tij është bërë nga Shërbimi i Kontrollit të Brendshme në bashkëpunim me Prokurorinë e Rrethit Gjyqësor Korçë,  duke aplikuar metodat speciale të hetimit. Gjatë hetimeve, është bëri i mundur goditja e një grupi kriminal që kanë ushtruar për disa kohë  kontrabandë të mallrave industriale dhe atyre me akcizë, jashtë pikës doganore, në kufirin jeshil, në afërsi të Fshatit  Zaroshkë, Komuna Pustec (Liqenas), Korçë.
 
Në orën 04:20, të ditës së sotme, në fshatin Zaroshkë, u bë e mundur kapja në flagrancë e mjetit me targa bullgare “E 1233 KM”, i cili ishte i ngarkuar me mallra industriale, konfeksione, kontrabandë në sasi dhe vlerë të konsiderueshme.
 
Nga hetimet paraprake rezulton se Drejtori i Drejtorisë Rajonale për Kufirin dhe Migracionin në Qarkun e Korçës, Ylber Zyberi ka favorizuar në vazhdimësi kalimin e mallrave kontrabandë jashtë pikës doganore, duke shmangur shërbimet e policisë kufitare në vendkalimet e mjeteve të ngarkuara me mallra kontrabandë. Zyberi dyshohet se shpesh herë ka bërë edhe shoqërimin e mjeteve të ngarkuara me mallra kontrabandë me qëllim mos kapjen e tyre nga strukturat e policisë.

Burime nga Policia e Korçës, kanë bërë të ditur se, vetëm për makinën e bllokuar me mallra dëmi i shkaktuar ndaj shtetit është rreth 10 mijë euro. “Vetëm për këtë kamion detyrimi ndaj doganës ishte 10 mijë euro, dhe janë shpallur në kërkim 2 persona”, thanë burimet nga Policia e Korçës.

Sipas këtyre të fundit, dritat e kamionit ishin të izoluara me plasmas në mënyre që të mos diktoheshin gjatë natës kur kalonte malli që hynte nga Greqia.
 
SHKB në bashkëpunim me Njesinë Task-Force pranë Prokurorisë së Rrethit Gjyqësor Korçë, po vazhdojnë hetimet për zbardhjen e plotë të kësaj veprimtarie kriminale, të shtrirë në kohë edhe me shumë persona të tjerë të dyshuar, si dhe me implikime te strukturave të policisë kufitare në Qarkun e Korçës.
 
Redaksia online
(ac/shqiptarja.com)