Në Korçë ka nisur një nismë ligjore qytetare që synon mbulimin nga shteti të trajtimeve të specializuara për fëmijët që nuk mund të kurohen në Shqipëri. Për të kaluar në Parlament, projektligji kërkon mbledhjen e 20 mijë firmave nga qytetarët me të drejtë vote.

Sipas përfaqësuesit të shoqërisë civile, Ardit Konomi, iniciativa do të shtrihet në të gjithë vendin dhe është e përballueshme për buxhetin e shtetit, pasi bëhet fjalë për rreth 35-60 raste në vit. Ai theksoi se projektligji është hartuar për të shmangur burokracitë dhe për të garantuar akses të barabartë.

“Sot po të startojmë zyrtarisht nga Korça, thirrja është që çdo qytetar të na bashkohet. Për qarkun e Korçës nuk kemi statistika por kemi marrë statistika kombëtare. Janë 35-60 raste në vit. Është një buxhet që përballohet nga qeveria”, thotë Ardit Konomi.

Avokatja Evis Miço u shpreh se projektligji plotëson boshllëqet në legjislacion dhe vendos në qendër mbrojtjen e fëmijëve që kanë nevojë për trajtim të specializuar. Ndërsa Migen Qeraxhi theksoi se nisma synon t’i japë fund pabarazive dhe vështirësive që hasin familjet për të siguruar trajtim, shpesh duke iu drejtuar donacioneve.

"Është një proces i rëndësishëm. Kërkojmë që qyterarët jo vetëm në Korçë ta mbështesin këtë nismë. Është një ndihmë shumë e madhe për prindërit dhe shpresojmë që t’ia dalim”, tha avokatja Evis Miço.

Projektligji parashikon krijimin e një fondi të dedikuar, procedura të përshpejtuara për rastet urgjente dhe më shumë transparencë në vendimmarrje.

Organizatorët u bëjnë thirrje qytetarëve të firmosin, duke theksuar se “një firmë sot mund të shpëtojë një jetë nesër”.