Korkuti me ekipin e akademisë sot
kqyr “skenën e spektaklit” në Apolloni

TIRANE- Një ekip i Akademisë së Shkencave i kryesuar nga Akademik Muzafer Korkuti, Kryetar i Akademisë, “do të kqyrë gjendjen në vend në vijim të sensibilitetit të lartë publik në lidhje me spektaklin kulturor që do të organizohet në qendër të Parkut Arkeologjik të Apolonisë si dhe për kujdesin që duhet treguar ndaj monumenteve”. Kështu deklarohet nga zyrat e shtypit të këtij institucioni. Kryetari i Akademisë, Korkuti, njëkohësisht dhe arkeolog i njohur ka vendosur të shkojë vet të këqyre situatën në vend dhe pohon se prej aty do të ketë një komunikim me mediat, sot në orën 11.00 të datës 11 korrik 2014.

Alarmi për ngritjen e skenës së spektaklit në Parkun Arkeologjik të Apolonisë ka ardhur nga anëtarët e forumit të Mbrotjes së Trashëgimisë Kulturore. Ndërkohë Ministria e Kulturës ka deklaruar një ditë më parë se skena e spektaklit “është ngritur brenda normave të Kartës së Veronës”. Sërish dje Ministria e Kulturës ka dërguar një deklaratë tjetër për shtyp ku thekson se “Ministria e Kulturës gjen rastin edhe njëherë të nenvizojë se: Aktiviteti kulturor i kompanisë Bankers Petroleum Albania Ltd. i parashikuar për datën 13 korrik 2014 po zhvillohet në mbikqyrjen e plotë dhe profesionale të Zyrës së Administrimit dhe Koordinimit të Parkut.

Ministria e Kulturës garanton dhe siguron se spektakli i organizuar në Parkun Arkeologjik të Apolonisë do të zhvillohet konform Kartës së Veronës “Kartës për përdorimin e vendeve antike për spektaklin”. Sipas këtij dokumenti bazë, mbi të cilin mbështetet organizimi i spektakleve në vendet antike dhe parqet arkeologjike në gjithë Evropën, konservimi i këtyre strukturave ka kuptim vetëm nëse ato vihen në dispozicion të publikut. Natyrisht me kusht që të respektohet brishtësia e monumenteve dhe parimi i reversibilitetit të strukturave ndihmëse që mund të ndërtohen provizorisht.” Këtë deklaratë Ministria e Kulturës e argumenton me disa foto përmes të cilave tregohet se shumicva elementeve të skenëns janë të mbështetura mbi platforma druri. 


Shkrimi u botua në Shqiptarja.com (print) në 11 Korrik 2014

Redaksia Online
(d.a/shqiptarja.com)