Basha mesazh mjekëve nga selia blu: Qeveritë shkojnë dhe vijnë! Ju keni në dorë shëndetin e shqiptarëve! (VIDEO)

TIRANE - Kryedemokrati Lulzim Basha në një konferencë për shtyp nga selia blu i është drejtuar me një mesazh personelit shëndetësor që të mos ngurojnë të kërkojnë atë që ju nevojiten pasi jeta dhe shëndeti i shqiptarëve është në duart e tyre. Ai tha se Shqipëria ka një nga stafet më të specializuara për të përballuar çdo situatë dhe tani duhet të kenë në dispozicion mjetet dhe fondet e nevojshme mjekësore.

"Sot u konfirmuan edhe zyrtarisht dy rastet e para të të prekurve nga koronavirusi. Duke u uruar atyre shërim sa më të shpejtë, dua t’ju drejtohem me këtë mesazh. Së pari, personelit shëndetësor, të nderuar mjekë dhe infermierë. Shëndeti i shqiptarëve është në duart tuaja. Sytë, veshët dhe mendjet e njerëzve, si asnjëherë, janë të fokusuara te ju. Prandaj, sot të gjithë jemi në mbështetjen tuaj për të zbatuar masat dhe vendimet që ju sugjeroni dhe vendosni. Nuk duhet të ngurroni për asnjë çast të kërkoni çfarë ju nevojitet për të përmbushur misionin tuaj. Qeveritë ikin e vijnë, ata që do të mbeten jeni ju, ata që keni në dorë jetën e gjithsecilit prej nesh, jeni ju.  Ne kemi një nga stafet më të specializuara mjekësore për të përballuar çdo situatë dhe ajo që duhet t’u japim juve sot, janë mjetet dhe fondet e nevojshme mjekësore për ta përballuar këtë gjendje me sukses", u shpreh Basha.

Kryedemokrati theksoi se duhen dëgjuar këshillat e mjekëve si dhe i bëri thirrje atyre që vijnë nga Italia e Veriut që të vetëkarantinohen. Ai tha se nuk është koha për panik por për kujdesi maksimal.

"Të gjithë duhet të dëgjojmë zërin tuaj. Sa më shumë të flisni ju, aq më të qetë do të jenë qytetarët. Të dashur bashkëqytetarë! Sot duhet të jemi të ndërgjegjshëm dhe të përgjegjshëm për çdo veprim që ndërmarrim. Të dëgjojmë me vëmendje këshillat e mjekëve dhe t’i zbatojmë ato. Të gjithë ju që vini nga Italia e Veriut, por edhe zona të tjera të prekura nga coronavirusi, drejtohuni për ekzaminime, nëse keni simptoma gripi dhe shmangni kontaktet me qytetarët dhe të afermit për një periudhë 2 javore. Kujdes të veçantë duhet të kemi për të moshuarit. Sot nuk është koha për panik, por për kujdes maksimal. Sa më të kujdeshëm të jemi sot, aq më lehtë do ta kalojmë këtë situatë dhe me pasoja minimale. Ne do të jemi në ndjekje të situatës hap pas hapi. Ekspertët dhe specialistët tanë të shëndetësisë do të jenë në shërbimin e çdo qytetari për çdo informacion shtesë që do të kenë", u shpreh Basha.

Basha u ndal edhe tek grupi i ekspertëve të PD të ngritur për monitorimin e situatës nga koronavirusi, duke theksuar se ai do të monitorojë hap pas hapi situatën si dhe do të jetë në shëbrim të çdokujt. Ai vuri theksin në tre kompenentë që sipas tij janë më të rëndësishmit për të përballaur këtë situatë: Fondet e mjaftueshme, mobilizimi maksimal dhe transparenca.

"Dy javë më parë, nga kjo foltore i kam bërë thirrje qeverisë të marrë masa për t’u përgatitur për përballimin e situatës. Fondet e mjaftueshme. Mobilizimi maksimal. Transparenca  Këto janë tre komponentë të rëndësishëm politikë, për të cilët nuk duhet humbur kohë.  Dua t’ju siguroj se ne do të vazhdojmë ta ndjekim situatën hap pas hapi. Ekspertët dhe specialistët tanë të shëndetësisë do të jenë në shërbimin e çdokujt, ndërkohë që grupi i krizës, i ngritur pranë PD, bashkë me ekspertët e opozitës, do të vazhdojë të monitorojë dhe të bëjë gjithçka në mundësitë, kapacitetet dhe fuqitë tona për të qenë sa më afër njerëzve dhe për të tejkaluar këtë situatë me pasoja sa më të lehta", përfundoi Basha.

Mjekja Mirela Tabaku u shpreh se duhet një komunikim transparent për masat e marra nga qeveria lidhur me koronavirusin.

"Është e rëndësishme që të bëhet një komunikim transparent lidhur me masat e marra nga qeveria. Prioritet është marrja e masave e urgjente. Duhet të veprohet shpejt nga ana e qeverisë. Personeli të pajiset me pajisje mbrojtëse. Marrja e masave për pajisjen me masa mbrojtëse të stafeve. Trajnim i stfafeve mjekësore për pacientët dhe mbrojtjen e tyre. Fuqizimi dhe shtimi i laboratorëve kudo që ata janë. Rritja e kujdesit dhe promovimi i masave parandaluese në të gjitha mediat. Karantim i detyrueshëm për personat që kanë kontakt me persona të prekura. Fonde të detyrueshme nga ana e qeverisë"iu shpreh ajo.

Rendit zhvillimet sipas orarit:

Të Fundit Të Parat

B.K.//Shqiptarja.com

TAG:
• lulzim basha
• PD
• Koronavirus