Në njoftim, veç tjerash Krasniqi thotë se vazhdon t’i beson programit të PDK-së, duke e konsideruar madje edhe detyrim sipas statutit dhe ndërgjegjes, i cili garanton “zgjedhje të lira me votë të fshehtë plurale dhe të barabartë”, që jetën e mbron me ligj, që angazhohet për media të lira, për shprehje e mendim të lirë, për paprekshmëri të pronës dhe lëvizje të lirë.
Të gjitha këto të drejta, sipas Krasniqit, kanë gjetur hapësirë të madhe në Kushtetutën e Republikës së Kosovës dhe se këto të drejta PDK-ja i ka vendosur shumë kohë më parë. Por programi sipas tij nuk po respektohet.
Krasniqi është shprehur edhe për zgjedhjet e fundit nacionale dhe sidomos këto të fundit partiake, që sipas tij dëshmojnë përfundimisht se kreu i PDK-së e ka nxjerrë tërësisht partinë nga shtrati i saj themeltar, jashtë programit e statutit të saj, rrjedhimisht jashtë të gjitha vlerave themeluese e normuese. Krasniqi thotë se kreu i PDK-së ka eliminuar çdo debat, diskutim e bashkë me këtë çdo vlerë që do të rezultonte gjithandej edhe për çështjet më vitale për vendin dhe kombin.
As për reformën zgjedhore, “një anëtar një votë”, as për qeverisjen e fundit edhe pas shumë skandaleve nuk ka pasur gatishmëri për të diskutuar, analizuar e ndryshuar, thotë ndër të tjera sekretari i përgjithshëm i PDK-së.
Sipas Krasniqit, kulmi i të gjitha këtyre, në dy vitet e fundit, është shfaqur në përcaktimin - emërimin e njerëzve pa asnjë kriter në institucionet më të larta të vendit, skandalet e vazhdueshme në kabinetin qeveritar deri te krimi i organizuar, i manifestuar në rastin e “Grandit”, “Veliaj” etj.
“Mbi lakminë dhe shkëlqimin e përkohshëm të sedrës falso, parapëlqej çmimin e peshës së rëndë për mos-bërje ndërgjegjeje nesër” ka thënë Krasniqi. Të gjitha këto sa u thanë, përfshirë edhe zgjedhjet e fundit partiake jashtë çdo norme statuti, jashtë vullnetit të anëtarësisë së identifikuar të partisë dhe të strukturave të saj, më japin arsye dhe kurajë të mos jem pjesë e as pjesëmarrës në Kongresin “zgjedhor” të PDK-së, ka thënë ai, duke shtuar se përmes këtij procesi “zgjedhor”, kreu i saj ka bërë zgjedhje për të kënaqur ambiciet e tija dhe vetëm të tija, por jo zgjedhje për Kosovën dhe qytetarët e saj. Në qoftë se veprimi im, në çfarëdo mënyre, prek sadopak membranën e ndërgjegjes suaj bashkëveprues të deritashëm, ndihem i lumtur, i qetë e me fat”, përfundon deklarata e sekretarit të përgjithshëm të PDK-së, Jakup Krasniqi.
(rtk/eç/shqiptarja.com)
![](https://www.shqiptarja.com/template/img/sh_logo1.png)