Kosovë-Kroaci nesër në Shkodër
Policia: Ja rrugët që do të bllokohen

Drejtoria e Policisë Shkodër ka publikuar planin e masave për ndeshjen që do të zhvillohet nesër mes Kosovës dhe Kroacisë në orën 20:45 në stadiumin ‘Loro Borici’.
 
Në kuadër të mbarëvajtjes së rendit dhe sigurisë është parashikuar bllokimi i qarkullimit në disa rrugë, ndalimi i parkimit dhe kufizimi i lëvizjes.
 
Në stadium do të nisë hyrja në orën 17:00 e tifozëve, ndërsa ndalohen sendet e forta, boritë, shishe, fishekzjarre, monedha apo sendeve metalike.
 
 
Masat e policisë Shkodër
Masat e marra nga D.V.P Shkodër për zhvillimin normal të ndeshjes ndërkombëtare të futbollit ndërmjet ekipeve “Kosaova” dhe “Kroacia”
 
Më datë 06.10.2016 ora 20.45 në qytetin Shkodër, do të zhvillohet ndeshja ndërkombëtare e futbollit, e vlefshme për Kampionatin Botëror 2018, ndërmjet përfaqësuesëve të Kosovës dhe Kroacisë, ndeshje e cila do të luhet në stadiumin “Loro Boriçi”.
 
Drejtoria Vendore e Policisë Shkodër, do të marrë një sërë masash teknike dhe organizative për, sigurimin e rendit dhe sigurisë publike, para, gjatë dhe pas zhvillimit të ndeshjes ndërkombëtare të futbollit, duke synuar një mbarëvajtje të aktivitetit sportiv.
 
Në kuadër të këtyre masave të parashikuara, informojmë qytetarët e qytetit Shkodër dhe tifozeritë ardhur nga Kroacia, Kosova dhe treva të tjera, që do të ndjekin ndeshjen në stadiumin “Loro Boriçi” se, DVP Shkodër, për mbarëvajtjen normale të aktivitetit sportiv, do të marrë disa masa ndaluese dhe kufizuese mbi qarkullimin dhe parkimin e automjeteve në afërsi të stadiumit dhe në akset rrugore që lidhen me të, si më poshtë vijon:
 
Për lëvizjen e automjeteve dhe parkimin e tyre do të përdoret Unaza e Qytetit Shkodër, si nga krahu lindor ashtu edhe nga krahu perëndimor.
 
Për parkim të automjeteve në qytetin Shkodër do të përdoren këto vende:
 
o             Sheshi “Mehmet Shpendi” tek ish Ndërmarrja e Fermentimit.
o             Gjatësia e rrugës së Shkollës së Mesme Industriale “Arben Broci”.
o             Sheshi tek stacioni i trenit të udhëtarëve.
o             Sheshi dhe rruga tek “Fusha e Druve” në unazën lindore.
 
 
1.            Në rrugën “Bujar Bishanaku”, (ose rruga e gjerë e Kirasit), duke filluar nga ora 10:00 do të ketë ndalim të qarkullimit rrugor dhe ndalim të parkimit të automjeteve në të dy kahet e rrugës, deri në orën 24.00. (Marrja e këtyre masave bëhet për arsye se kjo rrugë do të jetë e vetmja rrugë kryesore e hyrje-daljes së tifozave vendas dhe të huaj.)
 
2.            Në aksin bulevardi “Zogu i Parë" (ose sheshi Parrucë deri tek "Ish 5-Heronjtë"), duke filluar nga ora 10:00 do të ketë kufizim të qarkullimit dhe ndalim parkimi të automjeteve në të dy kahet e rrugës, deri në orën 24.00.
 
3.            Do të ndalohet parkimi i automjeteve dhe lëvizja e tyre nga degëzimet e rrugës që të çojnë në rrugën “B. Bishanaku” dhe anasjelltas, nga ora 10.00 deri në ora 24.00.
 
4.            Do të ndalohet parkimi dhe lëvizja e automjeteve në rrugën “Zyhdi Repishti” (rruga e ish poligonit të qitjes) nga ora 10.00 deri në orën 24.00.
 
5.            Do të ndalohet parkimi dhe lëvizja e automjeteve në rrugën e tregut industrial dhe fruta-perime në Zdrale nga ora 10.00 deri në orën 24.00.
 
6.            Do të ketë kufizim lëvizjeje të automjeteve në orët e pasdites deri në përfundim të ndeshjes në segmentet rrugore:
 
o             "Xhabije - Parrucë"
o             "Sheshi 2 Prilli - Parrucë"
o             "Kryqëzimi i ish degës - Ish 5-Heronjtë"
o             "Kryqëzimi i Rusit - Ish 5-Heronjtë"
 
Aktiviteti sportiv është parashikuar të fillojë në orën 20.45 dhe hyrja e tifozerisë, me qëllim shmangien e konfuzionit, do të nisë në orën 17.00. 
 
Kërkojmë mirëkuptimin e sportdashësve që do të  marrin pjesë në këtë aktivitet në respektimin dhe zbatimin e këtyre masave si dhe paisjen me biletë dhe dokument identifikimi, duke shmangur njëkohësisht mbajtjen me vete dhe futjen në ambientet e stadiumit të, sendeve të forta, borive, shisheve të çfarëdolloji, fishekzjarreve, monedhave apo sendeve metalike, pasi në hyrje do të kontrollohen fizikisht të gjithë.
 
Njoftojmë administratorët e bizneseve që zhvillojnë aktivitet tregëtar përreth dhe në afërsi të stadiumit “Loro Boriçi” të tregohen mirëkuptues duke i mbyllur aktivitetet në orën 14.00.
 
Drejtoria Vendore e Policisë Shkodër, kërkon mirëkuptimin komunitetit shkodran dhe drejtuesve të automjeteve, të shmangin zonën ku zhvillohet aktiviteti sportiv duke përdorur akse dhe drejtime të tjera lëvizjeje pasi, do të vlerësohej si një ndihmë mjaft e çmuar në mbarëvajtjen e dhe garantimin e masave të sigurisë.
 
Duke falenderuar qytetarët për mirëkuptimin dhe mediat për bashkëpunimin.



dy.b/shqiptarja.com