Kosova, 4 vjet shtet, Jahjaga:
Do e bëjmë siç e duam ne

PRISHTINE- Kosova feston sot katër-vjetorin e shpalljes së pavarësisë, njëra nga datat më të rëndësishme të historisë së deritashme të vendit.

Dita e sotme ka nisur me nderime për heronjtë dhe dëshmorët e lirisë dhe pavarësisë. Shumë qytetarë dhe delegacione po bëjnë homazhe te Memoriali në Prishtinë i Presidentit Historik Ibrahim Rugova – ideatorit e arkitektit të pavarësisë dhe në Prekaz, te Memoriali Adem Jashari – Komandantit Legjendar të UÇK-së dhe familjes së tij heroike. Mes veprimtarive të shumta, në kryeqytetin e shtetit më të ri evropian, Prishtinë, sot rreth mesditës, në sheshet "Skënderbej" e "Nëna Tereza", të mbushura plot njerëz, parakaluan edhe Forca e Sigurisë të Kosovës.

JAHJAGA: E ARDHMJA NE BE E NATO
Presidentja e Kosovës, Atifete Jahjaga para pjesëtarëve të Forcës së Sigurisë së Kosovës, çmoi veprën e të gjithë atyre që punuan dhe luftuan për të arritur pavarësinë.

“Të ardhmen e Kosovës e shohim në integrimin e plotë në BE, NATO dhe në miqësinë e përjetshme me SHBA-të”, tha presidentja duke shtuar se “FSK-ja i ka përmbushur të gjitha kapacitetet operacionale dhe është e gatshme që të kalojë në fazën tjetër që e kërkon vendi ynë".

“Kosova do të jetë ashtu siç ne duam”,  nënvizoi Jahjaga, duke uruar Pavarësinë së Kosovës.

THACI: 17 SHKURTI BASHKON SAKRIFICEN ME SFIDAT
Ndërsa, kryeministri i Kosovës, Hashim Thaçi tha se katër vite më parë u bë hapi final duke u shpallur Kosova shtet i pavarur dhe sovran. “17 shkurti bashkon në një sakrificën e së kaluarës, përkushtimin për të tashmen, dhe sfidat për të ardhmen”, ka thënë kryeministri Thaçi, i cili gjithashtu ka lavdëruar punën e pjesëtarëve të FSK-së.

Edhe nëpër qytetet e tjera u zhvilluan programe festive, përfshirë koncertet dhe fishekzjarret, organizuar nga komunat.  Festohet sot edhe në secilën familje shqiptare, por edhe të komuniteteve të tjera, për Kosovën atdhe të përbashkët të lirisë, pavarësisë dhe demokracisë

RRUGETIMI I KOSOVES DREJT PAVARESISE
Të mbledhur në Kuvendin e Kosovës, më 17 shkurt të vitit 2008, ligjvënësit kosovarë nënshkruan deklaratën e pavarësisë.

Asaj i parapriu një rrugëtim i gjatë në vite, por që nisi të marrë formë në vitet e para të shpërbërjes së ish-Jugosllavisë. Filloi me grevën e minatorëve të Trepçës, në mbrojtje të pozitës kushtetuese të Kosovës, për të vazhduar më pas me ndryshimin e Kushtetutës së vitit 1974, protestën e Lëvizjes Studentore, sulmet e forcave serbe në Prekaz e deri te ngjarja që vuri themelet e historisë së re – bombardimet e Aleancës Veriatlantike në caqet serbe.

Fushata e NATO-s, që nisi më 24 qershor të vitit 1999 dhe që zgjati për plot 78 ditë, u karakterizua me dëbimin masiv që u bënë forcat serbe shqiptarëve të Kosovës, ndërsa rezultoi me kapitullimin e autorit të luftës – Sllobodan Millosheviç.

U deshën më shumë se tetë vjet që të miratohet shpallja e koordinuar e pavarësisë ndërmjet Uashingtonit, Brukselit dhe Prishtinës, sipas planit të ish-presidentit finlandez, Marti Ahtisari.

Po ku është Kosova sot, katër vjet pas krijimit të shtetësisë? Ajo ka siguruar njohje prej 87 shtetesh ndërkombëtare – shifër kjo që nga disa konsiderohet e kënaqshme, nga të tjerët e pamjaftueshme.

Në ditët e para të lindjes, shtetësia e Kosovës është pranuar nga fuqitë e mëdha botërore, si Shtetet e Bashkuara, Gjermania, Britania, Franca, Austria. Kosova është njohur edhe nga të gjitha shtetet përbërëse të ish-Jugosllavisë, përjashtuar këtu Bosnjë-Hercegovinën dhe Serbinë.

Por, pengesa të konsiderueshme për shkak të mosnjohjes vlerësohet se paraqesin pesë vendet e Bashkimit Evropian - Greqia, Spanja, Sllovakia, Qiproja dhe Rumania - që, sot e kësaj dite, nuk e kanë marrë ende një vendim të tillë. Mosunifikimi i bllokut 27-anëtarësh mbetet sfidë për Kosovën sa i përket integrimit, por jo vetëm.

Shteti më i ri në Evropë ka një shkallë të lartë të varfërisë dhe papunësisë, ndërsa ka shënuar zhvillim të ngadalshëm ekonomik. Korrupsioni dhe krimi i organizuar nuk e kanë lënë Kosovën jashtë grupit të shteteve rajonale, të përfshira në këto dukuri. Sfidë numërohet edhe pavarësia e gjyqësorit, ashtu si edhe liria në media.

Në marsin e vitit të kaluar, Prishtina zyrtare ka hyrë në një proces që nga aktorët ndërkombëtarë është mirëpritur, por jo edhe nga të gjithë kosovarët – dialogu me Beogradin për, siç është thënë, çështjet e pazgjidhura teknike.

Procesi nuk mund të konsiderohet më pak sfidant për Kosovën, pasi shteti serb vazhdon të mos zbatojë si duhet marrëveshjet që kanë arritur palët, si dhe të shfaqë pengesa për arritjen e kompromiseve të reja.

Përfaqësimi i Prishtinës në nisma rajonale është shkaku i ngecjes disamuajshe të negociatave, me gjithë thirrjet e Brukselit, si ndërmjetësues në proces, që palët t’i kthehen tryezës së bisedimeve.

Beogradi do që Kosova të përfaqësohet nën Rezolutën 1244 të Kombeve të Bashkuara, por një gjë e tillë kundërshtohet fuqishëm nga vetë Kosova, e cila do që të përfaqësohet si shtet i pavarur dhe sovran.

Kjo është vetëm njëra nga këmbënguljet e autoriteteve kosovare, të cilat i pret edhe realizimi i premtimeve të tjera: qytetarët kosovarë duan liri të lëvizjes – Kosova është i vetmi vend në Ballkan që nuk gëzon liberalizim vizash me BE-në.

Zotimi i krerëve kosovarë mbetet shpresëdhënës.
(Valona Tela, europaelire/shqiptarja.com)