Kosovë, zhbllokohet ngërçi
Veseli sërish kryeparlamenta

Duket se situata politike po gjen rrugën e zgjidhjes të paktën në formimin e qeverisë.

Pas dështimit të gjashtë radhazi të seancës parlamentare më në fund Kuvendi i Kosovës do të ketë sërish kryetar të saj Kadri Veselin.

Ndërkohë, në këtë seancë janë zgjedhur edhe 3 nënkryetarët e Kuvendit: Xhavit Haliti, Aida Dërguti dhe Kujtim Shala.

Mbajtja e seancës është rezultat i marrëveshjes së arritur orët e vona të së mërkurës mes liderëve të PDK, AAK, Nismës, AKR, përfaqësuesve të Listës Serbe dhe pakicave të tjera. 

Seanca e sotme, ishte vazhdimësi e seancës konstituive të 3 gushtit, e cila u ndwrpre  gjashtë herë, për shkak të mungesës së votave për zgjedhjen e kryetarit të ri të këtij institucioni.

Zgjedhjen e Veselit nuk e kanë përkrahur Lidhja Demokratike e Kosovës dhe Lëvizja Vetëvendosje.

Për Veselin kanë votuar 62 deputetë, kundër 52, ndërkaq nuk kishte abstenime.

Pas zgjedhjes së kryetarit, deputetët kanë votuar edhe tre nënkryetarët e rinj, të cilët përbëjnë Kryesinë e re të Kuvendit.

Nënkryetarë janë zgjedhur, Xhavit Haliti nga Partia Demokratike e Kosovës, Aida Dërguti nga Lëvizja Vetëvendosje dhe Kujtim Shala nga Lidhja Demokratike e Kosovës.

Nga momenti i zgjedhjes së kryetarit dhe nënkryetarëve, Kuvendi konsiderohet i konstituar.

Bazuar Kushtetutën e Kosovës, i takon koalicionit PDK, AAK, Nisma, AKR dhe pakicat që të nominojnë edhe zyrtarisht mandatarin për formimin e Qeverisë së re.

Pritet që ai të jetë lideri i AAK-së, Ramush Haradinaj.

Sipas procedurave, Haradinaj duhet të marr bekimin e presidentit të Kosovës Hashim Thaçi, i cili i drejtohet Kryesisë së re të Kuvendit me kërkesën për thirrjen e seancës për zgjedhjen e Qeverisë.

Pas konstituimit të Kuvendit, votimi për Qeverinë mund të ndodhë që nga sot pasdite apo edhe brenda periudhës kohore prej 15 ditëve.

Redaksia Online
e.m/Shqiptarja.com