Kotzias e Bushati apel BE: Mos shtyni rrugën europiane për Shqipërinë, është pasurim i projektit europian

Një ditë pasi u dha vendimi për shtyrjen e çeljes së negociatave për Shqipërinë dhe Maqedoninë e Veriut për në tetor, ka ardhur edhe një reagim i 4 ish-ministrave të Punëve të Jashtme të 4 vendeve të ndryshme.

Me anë të një kërkese të përbashkët, ish-ministrat e Punëve të Jashtme të Shqipërisë, Ditmir Bushati; i Greqisë, Nikolaos Kotzias; i Bullgarië, Daniel Mitov dhe i Qipros, Jannakis Kasoulidis , i drejtohen Bashkimit Europian me apelin për të hapur negociatat për Shqipërinë dhe Maqedoninë e Veriut.

Në komunikatën e përbashkët të 4 ish-ministrave thuhet se procesi i anëtarësimit në BE rrit mundësitë për të përmirësuar demokracinë dhe zhvillimin socio-ekonomik, për të siguruar të drejtat e qytetarëve në këto vende.

Ndër të tjera ata shprehen: Ne i bëjmë thirrje vendeve anëtare të Bashkimit Evropian të mbështesin rekomandimin e Komisionit Evropian për çeljen e negociatave të anëtarësimit me Shqipërinë dhe Maqedoninë e Veriut. Më pas në komunikatë thuhet se Gjermania dhe Franca duhet të tregojnë përgjegjshmërinë e duhur për të ardhmen e Bashkimit Europian dhe Europës dhe të përmbushin premtimet e tyre.

Në fund të deklaratës 4 ish-ministrat e Jashtëm bën thirrje që të vendoset një datë konkrete për hapjen e negociatave. Artikullit me kërkesën e përbashkët të 4 ish ministrave i është bërë jehonë nga mediat.

Kujtojmë se edhe qershorin e kaluar vendimi u shty pikërisht si tani pas skepticizmit të tre vendeve, Holandës, Francës dhe Danimarkës.

Komunikata e përbashkët e 4 ish-ministrave drejtuar BE-së:

Komisioni Evropian prezantoi komunikatën e tij për Politikën e Zgjerimit të BE-së për vitin 2019, me raportet shoqëruese të vendeve, më 29 maj të këtij viti. Komisioni Evropian përsëriti rekomandimin drejtuar Këshillit për çeljen e negociatave për anëtarësim me Shqipërinë dhe Maqedoninë e Veriut, bazuar në progresin e kalendarin e miratuar në qershor 2018 nga vetë Këshilli.

Pavarësisht se është ndoshta politika me e suksesshme e transformimit të BE, asnjëherë me parë politika e zgjerimit nuk ka qenë subjekt i kaq shumë kundërshtive brenda vetë BE.

Ne i bëjmë thirrje vendeve anëtare të Bashkimit Evropian të mbështesin rekomandimin e Komisionit Evropian për çeljen e negociatave të anëtarësimit me Shqipërinë dhe Maqedoninë e Veriut.

Procesi i anëtarësimit në BE rrit mundësitë për të përmirësuar demokracinë dhe zhvillimin socio-ekonomik, për të siguruar të drejtat e qytetarëve në këto vende. Përmes monitorimit dhe shqyrtimit të progresit të arritur, BE do të asistojë dhe do të veprojë si partner në këtë proces.

Rritja socio-ekonomike e Shqipërisë dhe Maqedonisë së Veriut në rrugën e tyre drejt anëtarësimit në BE do të kontribuojë vendosmërisht për stabilitetin, sigurinë dhe zhvillimin e një shteti demokratik, drejtësinë dhe lirinë e shprehjes në të dy këto vende.

Nevoja për të filluar procesin e anëtarësimit për të dy vendet përkon me kërkesat e shoqërive të tyre, historisë së tyre dhe vetë rajonit. Ajo përkon, megjithatë, me nevojën e vetë Bashkimit Europian. Pranimi i tyre nuk do të thotë ti bësh nder dikujt, por është pasurim i vetë Projektit Europian.

Ne i bëjmë thirrje shteteve anëtare të BE, por kryesisht dy shteteve kryesore, Gjermanisë dhe Francës, të tregojnë përgjegjshmërinë e duhur për të ardhmen e Bashkimit Europian dhe Europës dhe të përmbushin premtimet e tyre. Ne u bëjmë thirrje të veprojnë me përgjegjshmërinë e duhur dhe të mos shtyjnë rrugën europiane për këto dy vende. Në këtë kontekst, duhet që Këshilli i Europian i qershorit, pa hezitim, të vendosë një datë për nisjen e negociatave me Shqipërinë dhe Maqedoninë e Veriut.

/G.M./Shqiptarja.com

TAG:
• BE
• ditmir bushati
• Nikos Kotzias
• Daniel Mitov
• Jannakis Kasoulidis