Kolegji i Posaçëm i Apelimit, institucioni që merr vendimet përfundimtare në procesin e vettingut, vendosi të enjten që prokurori i Tiranës, Petrit Vukaj, të mos shkarkohet dhe të vijojë punën në sistemin e drejtësisë.

Çështja kishte shkuar në apel pas ankimit të drejtuesit të SPAK, i cili kërkoi largimin e Vukajt nga detyra. Kërkesa bazohej në dy pika kryesore: pasuria e tij dhe mënyra se si kishte ushtruar profesionin.

Gjatë shqyrtimit, KPA konstatoi se në deklarimet e pasurisë kishte pasaktësi, veçanërisht për ndërtimin e një kati të banesës dhe për blerjen e një automjeti. Nga llogaritjet financiare rezultoi se në disa vite shpenzimet ishin më të larta se të ardhurat, me një diferencë totale rreth 1.5 milionë lekë.

Megjithatë, gjyqtarët e Kolegjit vlerësuan se këto probleme nuk ishin të mjaftueshme për shkarkim. Ata morën parasysh se një pjesë e banesës ishte ndërtuar mbi një objekt ekzistues, çka ulte kostot, dhe se ndërtimi pa leje ishte kryer para se ligji ta quante këtë vepër penale. Për automjetin, u çmua se rasti nuk ishte i përsëritur dhe nuk tregonte përpjekje për fshehje pasurie.

Edhe për punën e tij si prokuror, KPA pranoi se kishte disa mangësi në disa çështje, por i konsideroi ato jo të rënda dhe pa ndikim serioz në besimin e publikut tek drejtësia.

Në fund, Kolegji arriti në përfundimin se problemet e evidentuara nuk e kalojnë pragun ligjor për shkarkim. Për këtë arsye, Petrit Vukaj do të vijojë të jetë prokuror në Tiranë.

Njoftimi i plotë i Kolegjit të Posaçëm të Apelimit

" Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Albana Shtylla relatore, Mimoza Tasi, Natasha Mulaj, Sokol Çomo anëtarë, shpalli vendimin për çështjen nr. 39/2024, datë 15.10.2024, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 774, datë 14.06.2024, që lidhet me subjektin e rivlerësimit Petrit Vukaj. Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, me shumicë votash, vendosi: Lënien në fuqi të vendimit nr. 774, datë 14.06.2024 të Komisionit të Pavarur të Kualifikimit, që i përket subjektit të rivlerësimit Petrit Vukaj. Ky vendim është përfundimtar dhe ka efekt të menjëhershëm.U shpall sot, më datë 05.02.2026, në Tiranë"