KQZ miraton rezultatet e Fierit e
Elbasanit, mbeten edhe 5 qarqe

TIRANE - Komisioni Qendror i Zgjedhjeve(KQZ) miratoi me katër votat e anëtarëve të pranishëm nxjerrjen e rezultatit të votimit për zonën zgjedhore qarku Fier dhe zonën zgjedhore qarku Elbasan, në zgjedhjet e 23 qershorit.

 I ndarë në nëntë Zona të Administrimit Zgjedhor(ZAZ), në qarkun Fier funksionuan  576 qendra votimi, me 373.706 zgjedhës. Në përfundim të procesit të votimit, ZAZ-të përkatëse dorëzuan në KQZ kutitë e votimit, kutitë e materialeve zgjedhore dhe tabelën përmbledhëse të rezultatit për këtë qark. Pas verifikimit të tabelave dhe kryerjes së korrigjimeve përkatëse, KQZ, sipas kodit zgjedhor, miratoi tabelën përmbledhëse të rezultateve për këtë qark.

  Në zgjedhjet e 23 qershorit 16 mandatet e qarkut Fier u ndanë: 11 mandate për koalicionin e majtë "Aleanca për Shqipërinë Europiane" dhe 5 mandate për koalicionin e djathtë "Aleanca për Punësim, Mireqenie dhe Integrim". 

   Gjithashtu, KQZ miratoi sot dhe tabelat përmbledhëse të rezultateve për qarkun Elbasan. Kjo zonë zgjedhore përbëhet nga tetë ZAZ, ku funksionuan 540 qendra votimi, me 321.138 zgjedhës.
  Në zgjedhjet e 23 qershorit, 14 mandatet e këtij qarku u ndanë: 8 mandate për koalicionin e majtë "Aleanca për Shqipërinë Europiane" dhe 6 mandate për koalicionin e djathtë "Aleanca për Punësim, Mireqenie dhe Integrim". 

Komisioni Qendror i Zgjedhjeve(KQZ) shtyu të enjten nxjerrjen e rezultatit të votimit për zonat zgjedhore të qarqeve Durrës dhe Shkodër.

Deri tani KQZ ka nxjerrë rezultatet e 7 qarqeve, ndërsa brenda javës pritet dalja e rezultateve dhe për 5 qarqet e tjera, duke e përmbyllur këtë proces.
 
Redaksia online
(atsh/sg.shqiptarja.com)

TAG:
• kqz