Në mesnatën e së dielës së Pashkës, besimtarët ortodoksë të Beratit përjetuan momentin më të shenjtë të kalendarit të krishterë, shpalljen e lajmit të madh: “Krishti u ngjall! Vërtet u ngjall”.

Ceremonia solemne e Pashkës u zhvillua në katedralën “Shën Dhimitri” dhe u drejtua nga Mitropoliti i Beratit, Imzot Asti. Qindra besimtarë ortodoksë morën pjesë në këtë meshë të shenjtë, duke u mbledhur brenda dhe jashtë katedrales për t’u lutur për paqe, shëndet dhe një jetë më të mirë.

Liturgjia e ringjalljes nisi me meshën e shenjtë, ku u përcoll mesazhi i shpresës dhe i triumfit të jetës mbi vdekjen. Në vijim të ceremonisë, besimtarët morën dritën e shenjtë duke ndezur qirinjtë nga flaka e bekuar, një simbol i dritës hyjnore që secili e çon në shtëpinë e tij si shenjë bekimi dhe mirësi.

Momenti kulmor i kremtimit u shënua në mesnatë, kur në sheshin përpara katedrales, qyteti u ndriçua nga qindra qirinj në duart e besimtarëve, duke krijuar një atmosferë të veçantë shpirtërore dhe simbolike.


Lajmi kryesor:

Krishti u ngjall! Besimtarët ortodoksë kremtojnë Pashkën, Kryepeshkopi Joan: Bëni paqe në zemrën tuaj, ta përhapim në botë