Krimet Financiare, sekuestrohen
105 mln € të krimit gjatë vitit 2015

TIRANE- Një sasi prej 105 milion euro është bilanci i krimeve financiare të ndodhura në 6 mujorin e dytë të vitit 2015, përfshirë skemat e vjedhjes dhe pasuritë e sekuestruara për llogari të hetimeve. Këtë bilanc e ka zbardhur Prokuroria e Përgjithshme e cila ka renditur dhe bizneset e përfshirë në këto vjedhje në dëm të buxhetit të shtetit nga medikamentet deri te hidrokarburet. Sipas statistikave të akuzës rezulton se 60 milion euro ka qenë dëmi ekonomik në buxhetin e shtetit nga skemat mashtruese përfshirë dhe ato të evazionit fiskal dhe 45 milion euro janë pasuritë e sekuestruara me burim të paligjshëm.

Ndërsa skemat me vlerën më të madhe të mashtrimit ndaj shtetit rezulton ajo e biznesmenit italian Francesco Becchetti ku nëpërmjet kompanisë “KGE” Kalivac Green Energy ai ka mundur të përfitojë mbi 40 milion euro. Pas Becchettit renditet Kastriot Ismailaj i cili me kompanitë DIA dhe ADC ka përfituar 10 milion euro, i ndjekur më pas nga 2.5 milion euro të shmangies së detyrimeve për hidrokarburet skemë kjo e zbardhur nga akuza në Fier.

Në listën e pasurive të sekuestruara bëjnë pjesë, 2 hotele, 4 vila, 3 resorte turistike dhe mbi 30 mijë metra katror truall në zona të ndryshme përfshi dhe ato bregdetare. Referuar sekuestrove, prokuroria sqaron se ato kanë ardhur në zbatim të ligjit antimafia ku persona me precedent penal apo organizata kriminale kanë investuar në pasuri të paluajtshme në Shqipëri përfshi, hotele, vila, apartamente.

Para të thata 3.5 mln euro
Sipas njoftimit të prokurorisë, vetëm para në kesh janë sekuestruar rreth 3.5 mln euro, të cilat vazhdojnë të bllokuara në llogaritë e tyre bankare. Ndërsa vlera e një pjesë të pasurisë së bllokuar kap shifrën e mbi 23.6 milion euro. Te kjo shifër, sipas zyrës së shtypit pranë institucionit të akuzës, nuk janë përfshirë pronat dhe pasurit e sekuestruara 2 muajt e fundit për shkak se nuk ka përfunduar akt-ekspertimi kontabël i vlerësimit të pronave të bllokuara.

Por, pritet që të kap një shifër mbi 20 milion euro pasi janë sekuestruar pronat me sipërfaqe mbi 2.2 mln metër katror truall e mbi 1700 m2 apartamente të biznesmenit Farmir Kajollit si dhe pronat e pasurit e biznesmenit të njohur në Durrës Dashamir Gjoka. Për të dy këta persona, është vendosur bllokimi i pasurisë së tyre, pasi rezultojnë të dënuar për trafik droge në shtetit italian.

Në pronat e vendosura nën sekuestro, prokuroria ka renditur edhe ato të biznesmenit italian Francesko Beccheti e të afërmve të tij, të akuzuar për një sërë veprash penale. Gjithashtu në njoftimin e prokurorisë janë renditur edhe pronat dhe parat e sekuestruar të shtetasit Kastriot Ismailaj, i cili me anë të mashtrimit përfitoi nga kompania çeke CEZ shpërndarja një shumë prej rreth 4 milion euro. Në njoftim, zyra e kryeprokurori Llalla ka renditur edhe rastet e abuzimit me ilaçet e rimbursueshme të kompanisë “Omega Farma e cila i ka shkaktuar shtetit një dëm prej rreth 2.2 milion euro. Si dhe dy kompanitë e naftës, ajo e të arrestuarve të dosjes së shoqërisë së karburanteve ish-ALPET-it dhe kompania TEA OIL e të shpallurit në kërkim Adrian Xhillari.

Njoftimi i Prokurorisë
Prokuroria e Përgjithshme ka bërë një bilanc mbi aktivitetin e 6-mujorit të dytë të vitit 2015 në  luftën kundër krimit financiar, të lidhur kryesisht me krimin e organizuar, por edhe me mashtrime e fallsifikime, nga e cila rezulton se janë përfunduar hetimet për disa skema mashtruese, me vlerë përfitimi të paligjshëm dhe dëm ndaj shtetit rreth 60 milionë euro, si edhe janë vendosur nën sekuestro pasuri të paluajtshme e të luajtshme që arrijnë në një vlerë të përafërt rreth 45 milionë euro.
 
Skemat mashtruese financiare 
Gjatë 6-mujorit të dytë të vitit 2015, Prokuroria Shqiptare ka përfunduar hetimet dhe ka evidentuar personat përgjegjës në disa skema mashtruese financiare në tregun e karburanteve, farmaceutik, konçensione, ndërtim, etj.
Në muajin Tetor 2015, Prokuroria e Tiranës zbulon një skemë mashtruese me rimbursimin e fondit të ilaçeve, në vlerë rreth 2 milionë euro. Në krye të kësaj skeme dyshohet se është drejtuesi i kompanisë farmaceutike “Omega Pharma”. Kjo skemë ishte në vijim të një hetimi të nisur më parë gjatë vitit 2015, gjatë të cilës është evidentuar edhe një rast tjetër skeme mashtruese, për të cilën tashmë janë dërguar për gjykim disa zyrtarë të Fondit të Kujdesit Shëndetësor dhe administratorë farmacish.

Po në Tetor 2015, Prokuroria e Korçës zbuloi një skemë mashtruese financiare në vlerë rreth 1.5 milionë euro në tregun e materialeve inerte. Personat përgjegjës për këtë skemë u dërguan për gjykim në fund të muajit dhjetor 2015.

Në muajin Nëntor 2015, Prokuroria e Tiranës zbuloi një skemë mashtruese financiare në tregun e shitjes së aksioneve të kompanisë së naftës “FULLPET”, në vlerë shmangie detyrimi ndaj shteti rreth 500 milionë lekë të reja.

Në muajin Dhjetor 2015, Prokuroria e Tiranës ka përfunduar hetimet dhe ka dërguar për gjykim dy skema shumë të mëdha financiare, të shtrira në disa vite. Fillimisht, është dërguar për gjykim skema “DIA-ADC”, dy kompani me administror Kastriot Ismailaj, me vlerë rreth 10 milionë euro. Në vijim, Prokuroria e Tiranës përfundoi hetimet për një tjetër skemë mashtruese, “KGE”, me vlerë rreth 40 milionë euro, për të cilën akuzohen shtetasit Francesko Beketi dhe disa bashkëpunëtorë të tij.
Në muajin Dhjetor 2015, Prokuroria e Fierit zbulon një skemë mashtruese financiare në tregun e karburanteve, me vlerë shmangieje detyrimesh ndaj shtetit rreth 2.5 milionë euro. Për këtë skemë konsiderohet përgjegjës administratori i kompanisë “Tea Oil”, Adrian Xhillari. Për këtë skemë, aktualisht janë të arrestuar edhe disa ish-zyrtarë të lartë të Drejtorisë së Përgjithshme të Doganave, përfshirë ish-zv.drejtoreshën e Përgjithshme, të dyshuar se me veprimet dhe mosveprimet e tyre, kanë toleruar realizimin e kësaj skeme.

Po në muajin Dhjetor 2015, Prokuroria e Tiranës zbulon një tjetër skemë financiare, kësaj radhë në tregun e lojëravë të fatit, me një dëm ndaj shtetit në vlerë mbi 1 milionë euro. Për këtë skemë, konsiderohen përgjegjës shtetasit Ndoj dhe Paulin Preçi, administratorë të kompanisë së lojërave të fatit “Saturn Games”. 

Sekuestro dhe konfiskime 
Gjatë 6-mujorit të dytë të vitit 2015, Prokuroria Shqiptare ka sekuestruar ose konfiskuar pasuri të paluajtshme dhe të luajtshme, në një total prej dhjetra miliona euro, kryesisht në zbatim të ligjit “Antimafia” ose për shkak të veprave penale të fallsifikimit të dokumentave dhe përfshirjes në skema mashtruese financiare. Në total, në 6-mujorin e dytë 2015 janë sekuestruar: Llogari bankare në vlerë totale 3.2 milionë euro; Rreth 570 mijë m2 sipërfaqe tokë bujqësore dhe truall, një hotel dhe dy godina 8+12 kate, në vlerë totale rreth 23.6 milionë euro; Aksione në 8 kompani private. Po ashtu, me një vlerë ende të papërcaktuar, por në një shumë të përafërt rreth 15 milionë euro, janë sekuestruar edhe 8 apartamente, 2 vila 3-katëshe, dy komplekse tregtare me sipërfaqe 11 mijë m2 dhe 10 mijë m2, një pikë karburanti, një ndërtesë 1700 m2, 2.1 milionë m2 tokë bujqësore dhe 700 m2 truall. Në mënyrë të detajuar, paraqiten si më poshtë:

Në Qershor 2015, Prokuroria për Krime të Rënda kërkon konfiskimin e rreth 18.5 milionë lekë të reja, 940 mijë dollarë amerikanë të gjendura në llogari bankare dhe bono thesari, si edhe dy automjete, të regjistruara në emër të shtetasit Kastriot Ismailaj, administrator i shoqërisë “Adriatic Develoment Corporation LTD”. Këto pasuri ishin fillimisht nën sekuestro preventive, me një vendim të Gjykatës së Tiranës.

Po në Qershor 2015, me kërkesë të Prokurorisë së Tiranës, vendoset sekuestron preventive për disa kompani të administruara nga i pandehuri Francesko Beketi dhe bashkëpunëtorët e tij, në kuadër të hetimit për skemën mashtruese “KGE”.

Në Korrik 2015, Prokuroria për Krime të Rënda kërkon sekuestrimin e 6300 m2 tokë arë, me vlerë 11 milionë lekë të reja, në pronësi të Aleko Perlesi, në kuadër të ligjit “Antimafia. Në Dhjetor 2015, Prokuroria për Krime të Rënda ka kërkuar konfiskimin dhe kalimin në favor të shtetit të kësaj pasurie.

Prokuroria e Durrësit, me leje të gjykatës, ka vendosur në Korrik 2015 sekuestro preventive për 8 apartamente, një vilë, një lokal dhe një pikë karburanti, në pronësi të familjes Tepshi, të akuzuar nga autoritetet italiane për “trafik lëndësh narkotike”. Vlera e kësaj pasurie ende nuk është përcaktuar plotësisht.
Në fund të Korrikut 2015, Prokuroria për Krime të Rënda kërkon konfiskimin e llogarive bankare në shumën mbi 850 mijë euro, në emër të shtetasve Rovena Kalemi dhe Bledar Coraj, pasi nuk justifikonin burimin e tyre.

Në Gusht 2015, Prokuroria për Krime të Rënda, pas lejes së marrë nga gjykata, ka vendosur sekuestron preventive për një hotel dhe dy godina banimi 8 +12 kate, me vlerë totale rreth 10 milionë euro, në pronësi të Astrit Limani, i dënuar në Itali për “trafik lëndësh narkotike”.
Në Shtator 2015, Prokuroria për Krime të Rënda, në zbatim të ligjit “Antimafia”, ka vendosur sekuestro për mbi 11 mijë m2 truall dhe ndërtime, përfshirë biznese, si edhe për rreth 15.300 metra katrorë tokë bujqësore, të regjistruara në emër të shtetasit Dashamir Gjoka, i akuzuar nga autoritetet italiane për “trafik të lëndëve narkotike”. Vlera e këtyre pasurive është ende e papërcaktuar plotësisht.

Po në Shtator 2015, Prokuroria e Vlorës ka sekuestruar rreth 130 mijë m2 tokë pyjore në Palasë, me vlerë rreth 280 mijë euro, e përfituar me dokumenta të fallsifikuara, në emër të shtetasit Timolea Dhimoleo. Për këtë pasuri, në Dhjetor 2015 u vendos konfiskimi dhe kalimi në favor të shtetit.
Në Tetor 2015, Prokuroria për Krime të Rënda sekuestron 2.1 milionë metra katrorë tokë pyll, tokë arë dhe tokë truall në zonën turistike në Fier, përfshirë edhe 1700 metra katrorë ndërtesë, si edhe për 3 shoqëri private, të gjitha në emër të shtetasit Fatmir Kajolli, i dënuar në Itali për “trafik lëndësh narkotike”.
Po në Tetor, Prokuroria për Krime të Rënda, në kuadër të letër-porosisë së autoriteteve italiane, sekuestron kompleksin tregtar “Golden”, me sipërfaqe 10 mijë m2, si edhe disa pasuri të tjera të paluajtshme, me sipërfaqe totale rreth 500 m2, në emër të vëllezërve Altin dhe Emirjan Hajri, të akuzuar si drejtues të një rrjeti trafiku lëndësh narkotike.

 Prokuroria e Vlorës, në Tetor 2015, sekuestron rreth 44 hektarë tokë bregdetare, përfshirë edhe plazhin e Llamani, me vlerë mbi 9 milionë euro, e dyshuar si e përfituar në bazë të dokumentave të fallsifikuar në emër të shtetasit Jani Qirici.
Në Nëntor 2015, Prokuroria për Krime të Rënda sekuestron llogarinë bankare 2 milionë euro të kompanisë “ALENFRA”, me administratore shtetasen italiane Simoneta Coniglio, e dyshuar për burim të paligjshëm krijimi.

Në Dhjetor 2015, Prokuroria e Vlorës, në dy raste të ndryshme, ka vendosur sekuestro për një sipërfaqe toke prej 44 mijë m2, me vlerë 4.4 milionë euro, në zonën e plazhit të Jonufrës, e dyshuar si e përfituar me dokumenta të fallsifikuara nga pasardhësit e shtetasit Gjon Gjonboçari. Në rastin tjetër, janë sekuestruar 85 mijë m2 tokë në zonën e Palasës, me vlerë 200 mijë euro, e dyshuar si e përfituar në bazë të dokumentave të fallsifikuar nga disa shtetas. 

TAG:
• francesko becchetti
• Dashamir  Gjoka