Braho në Komision: Task-Forcë e përhershme për krimet zgjedhore! Të ashpërsohen dënimet, hetimet deri te përfituesit realë! Kriminelët në kërkim? Mund të nisim vetë me arrestimet (VIDEO)

Prokurori i Përgjithshëm, Olsian Çela, kërkoi rishikimin e kuadrit ligjor për veprat penale që cenojnë zgjedhjet e lira, duke propozuar ndryshime në disa dispozita të Kreut 10 të Kodit Penal për të përcaktuar më qartë rastet me rrezikshmëri më të lartë për procesin zgjedhor dhe për të parashikuar masa më proporcionale dënimi.

Ai theksoi gjithashtu nevojën për forcimin e kapaciteteve hetimore, përmirësimin e analizës së provave dixhitale, shtimin e burimeve njerëzore në prokurori, krijimin e një rrjeti të përhershëm koordinimi mes institucioneve dhe rritjen e kapaciteteve të Policisë së Shtetit për parandalimin dhe hetimin e krimeve zgjedhore.

“Kuadri ligjor për veprat që cenojnë zgjedhjet e lira. Disa nga dispozitat e Kreut X të Kodit Penal mund të rishikohen për të përcaktuar më qartë kur sjellja paraqet rrezikshmëri më të lartë për procesin zgjedhor, duke parashikuar si rrethana rënduese apo forma të cilësuara rastet kur veprat kryhen ndaj më shumë se një zgjedhësi e të tjera. Parashikimi i formave të cilësuara dhe rishikimi përkatës i masave të dënimit do të mundësonte një përgjigje penale më proporcionale

Shumë kallëzime apo referime nuk vijnë me të dhëna të mjaftueshme. Kjo nuk do të thotë se kallëzuesi duhet të marrë rolin e Prokurorisë, por informacioni fillestar duhet të jetë sa më i qartë për Prokurorinë. Hetimi i krimit kërkon forcimin e kapaciteteve të hetimit për analizën e pajisjeve elektronike, rrjeteve sociale, materialeve audio dhe pamjeve filmike. Hetimi kërkon mbështetje më të mirë teknike dhe kapacitete të dedikuara për provat dixhitale.

Një sfidë tjetër lidhet me ngarkesën e përgjithshme të prokurorive dhe mungesën e burimeve njerëzore, pasi disa prokurori vijojnë të funksionojnë nën kapacitetin e tyre organik. Vlerësohet të merret në konsideratë mundësia e krijimit të një rrjeti kombëtar operacional për integritetin zgjedhor, si një mekanizëm i përhershëm koordinimi, ku Prokuroria e Përgjithshme, SPAK, KQZ dhe Policia të shkëmbejnë informacione mbi rreziqet zgjedhore gjatë gjithë ciklit zgjedhor. Mbetet e nevojshme forcimi i kapaciteteve zbuluese, parandaluese dhe hetimore të Policisë së Shtetit për veprat penale që cenojnë integritetin e procesit zgjedhor. Roli i Policisë është thelbësor në çdo aspekt”, tha Çela.

Në bllok, opozita u ankua në komisionin e Reformës Zgjedhore për 11 majin dhe sistemin e patronazhimit, ndërsa në seancë dëgjimore ishte thirrur kreu i SPAK, Klodian Braho. Deputeti demokrat, Gent Strazimiri iu drejtua Brahos duke i thënë se revoltohet kur dëgjon se ai raporton se task-Forca për krimet zgjedhore pati efekt parandalues më 11 maj. Por, Braho u kujdes ti kujtojë se nëse do t’i referohet raportit të OSBE-ODIHR duhet të lexojë edhe atë që shkruhet qartë për Task-Forcën, pra që ka pasur efekt parandalues në krimin zgjedhor. Braho nënvizoi se nuk është ai kompetent për të vlerësuar procesin zgjedhor.

Gent Strazimiri: Efekti i një veprimi jo etik kur vjen nga kryeministri në fushatë elektorale që quan kinezëri kodin zgjedhor, që iu thotë policëve, mësuesve, mblidhni votat për PS, u thotë votuesve të opozitës, nëse votoni prapë për PD asnjë kokërr leku nuk keni për të pas. Këto janë veprime joetike, por janë frymëzimi nga kreu më i lartë i ekzekutivit dhe konvertohet në vepra penale në mënyrë masive, aq sa siç shprehet raporti i OSBE-ODIHR, thotë humbet vija e mes shtetit, administratës dhe partisë në pushtet. Aty ke pafund vepra penale të parashikuara apo të paparashikuara në kod po të duash të punosh. Patronazhimi nuk është vepër penale, mënyra se si realizohet, fakti që AKSHI ka përgatitur manual për tua shpërndarë armatës së PS. Mund të thuash që kemi vakum, por ti se thua që kemi vakum në kodin penal për këtë punë. Më jep instrumentet. Ajo që më thua dhe që më revolton, është fakti që e konsideroni që ka pasur efekt parandalues. Se çfarë u parandaluar ta thotë OSBE-ODIHR. Që në 2015 nis patronzhimi dhe se si rriten rekomandimet. Aty tregohet se sa rëndë është situata. Raporti të tregon ku është tumori, këtu jo, është i shëndetshëm. U përpoq SPAK të lexojë riskun më herët dhe të koordinojë reagimin. OSBE të thotë SPAK dhe policia dhe çdo organ që kishte detyrë të hetonin ishin zhgënjyes. Vetëm 5 procedime janë dërguar në gjykatë. Sa kanë qenë denoncime që gishtin e vënë tek qeveria dhe sa tek opozita.

Klodian Braho: Nuk është kompetenca jonë të bëjmë vlerësime të procesit zgjedhor. Nëse do t’i referoheni raportit, do i referoheni po atij raporti që strategjinë për parandalimin e krimit zgjedhor për SPAK pati efekt parandalues. Është vlerësim i raportit. SPAK nuk vendos se si një institucion duhet të bëjë referimin, SPAK ka detyrën të vlerësojë çdo referim që vjen nga secili institucion dhe nuk i imponohemi ne policisë apo institucioneve se si duhet ta bëjnë referimin dhe s cili subjekt është i kallëzuar në referim nuk e kemi të dhënë në sistem. Për ne s’ka rëndësi se cili subjekt është i kallëzuar, ka rëndësi kush kallëzon dhe çfarë provash ka.

Në Komisionin për Reformën Zgjedhore ku për krimet zgjedhore po raportonte kreu i SPAK, Klodian Braho ka pasur edhe momente tensioni mes socialsitëve dhe demokratëve.

Ulsi Manja teksa kërkonte që mbledhja ti kthehej normalitetit është përplasur me deputetin e PD, Ivi Kaso, ndaj të cilët ka përdorur edhe fjalë fyese si “legen”

“E mo qepe gojën dër dër dër…legen, mbylle gojën se të kam dëgjuar fort. A ka mundësi…a ka mundësi të kthehet mbledhja në normalitet, sepse vijmë këtu dhe bëjmë gjyqe”, iu drejtua Manja.

Situatën u mundua të qetësonte Damian Gjiknuri: “Po kërkoj unë ndjesë për atë, thelbi i bisedës ishte të fokusohemi për të cilën ajo e kemi thërritur. Në komisionin e ligjeve e kemi bërë praktike që ngremë cdo pyetje. Këtu e kemi thërritur për krimet zgjedhore”.

Në Komisionin e Posaçëm të Reformës Zgjedhore, Klodian Braho kreu i SPAK ka ngritur shqetësimin e personave që janë të shpallur në kërkim ose që janë të dënuar dhe arrestimi i tij ende nuk është kryer.

Braho tha se për persona të veccantë janë duke menduar një strategji për t’i arrestuar vetë. Braho nuk hodhi direkt akuza ndaj policisë së Shtetit por tha se: Nuk e di arsyen pse nuk arrestohen!

“Nuk ka kapacitet operacionale që SPAK sot të bëjë arrestime të personave në kërkim. Siç është fenomen shqetësues për ju, mund të jetë edhe për ne. Kemi disa të kërkuar me masa sigurimi në mungesë apo të dënuar në mungesë. E kemi ngritur vazhdimisht këtë shqetësim. A kemi një strategji? Është herët s’dua të bëj diçka publike sot, por ajo që mund të them është se po mendojmë një reagim të ndryshëm institucional nga SPAK që të jetë i aftë ti bëj vetë këto veprime të veçanta të natyrës operacionale”, tha Braho.

Në komisionin e Reformës Zgjedhore, deputetja e PD Albana Vokshi pyeti kreun e SPAK nëse ka getuar sistemin e patronazhimit, që sipas saj është ngritur nga PS për te vjedhur votën. Braho iu përgjigj se kjo nuk ka vepër penale që të ndëshkojë penalisht patronazhimin, e aq më tepër të jetë kompetencë e SPAK.

Albana Vokshi: Vitet e fundit më rezulton se është fenomeni më negativ, para zgjedhjeve, gjatë ditës së zgjedhjeve dhe pas zgjedhjeve, fenomeni i patronazhimit. Në shkelje të kushtetutës, janë vjedhur, shpërdoruar, abuzuar të dhënat personale të çdo votuesi. Pyetja që kam unë është a keni bërë juve ndonjë hetim kryesisht në lidhje me këtë fenomen. Çdo qytetar shqiptar është i survejuar. Janë trume, shihen përballë çdo qendre votimi. Është krim elektoral. A keni bërë ju ndonjë hetim për këtë. A do hetoni sistemin e patronazhimit, a do hetoni AKSHI-n.

Klodian Braho: Në Kodin Penal, nuk ka një vepër penale që të ndëshkojë penalisht patronazhimin, dhe aq më tepër të jetë kompetencë e SPAK. SPAK ka dy vepra penale, korrupsion aktiv dhe pasiv në zgjedhje. Nëse një funksionar ka shpërdoruar detyrën, nëse një person ka nxjerrë të dhëna personale është vepër tjetër penale që nuk është kompetencë e SPAK, por e prokurorive të juridiksionit të përgjithshëm.