Kërkesa e deputetes demokrate Jorida Tabaku për të hequr fashën 800 kwh për energjinë elektrike është hedhur poshtë në mbledhjen e Entit Rregullator të Energjisë.

Tabaku u shpreh se duhet mbrojtur interesi i qytetarëve dhe të hiqet fasha për 100 mijë familje shqiptare që sipas saj do t’i rritet çmimi i energjisë me 5 herë më shumë. Ndonëse ERE e rrëzoi kërkesën, përdori si argument faktin që çmimet e energjisë kanë rënë në bursë.

Më herët, ishte parashikuar që nga 1 tetori të aplikohej fasha 800 kwh dhe nëse familjet konsumonin më tepër në muaj, çdo kilovat më shumë do të llogaritej me çmim tregu.  Elemente pozitivë ndikuan në skemën e parashikuar nga qeveria për përballimin e krizës gjë ndikoi në shtyrjen e taksimit të fashës 800 kilovat. Kryeministri Edi Rama u shpreh se kishte tendencë kursimi nga qytetarët dhe pati përmirësim të nivelit në Fierzë prej reshjeve të shiut.

Ndërkohë nuk dihet ende nëse nga 1 nëntori do të aplikohet fasha 800 kwh.