Shtetet e Bashkuara u kanë kërkuar qytetarëve amerikanë në Iran që të largohen menjëherë nga vendi ose, në çdo rast, të “mbajnë profil të ulët” dhe të jenë “gjithmonë në kontakt” me familjen dhe miqtë.

“Kjo për shkak të masave të shtuara të sigurisë, mbylljeve të rrugëve, ndërprerjeve të transportit publik dhe bllokimeve të internetit”, thuhet në një njoftim alarmi në faqen e ambasadës virtuale në Teheran. Qytetarët amerikanë, nëse është e mundur në kushte sigurie, duhet të vlerësojnë mundësinë e largimit nga Irani nëpërmjet tokës drejt Armenisë ose Turqisë “menjëherë”. Përndryshe, paralajmërohet: “gjeni një vend të sigurt, shmangni demonstratat, mbani profil të ulët”.

Ministri i Jashtëm i Omanit, Badr al-Busaidi, i cili sot ka ndërmjetësuar negociatat mes Iranit dhe Shteteve të Bashkuara, deklaroi se bisedimet në Muskat kanë qenë “shumë serioze”, duke shtuar se ato kanë ndihmuar në qartësimin e qëndrimeve të të dyja palëve dhe në identifikimin e fushave të mundshme të përparimit. “Synojmë të takohemi sërish në kohën e duhur dhe rezultatet do të vlerësohen me kujdes në Teheran dhe Uashington”, tha al-Busaidi në një mesazh në X, sipas medias Iran International.

Ministri i Jashtëm iranian, Abbas Araghchi, deklaroi se bisedimet mes Iranit dhe SHBA-së, të ndërmjetësuara nga Omani, kanë nisur mirë. “Në përgjithësi, ishte një fillim i mirë, por vazhdimi do të varet nga konsultimet në kryeqytete”, tha Araghchi, i cili drejtonte delegacionin iranian, ndërsa delegacioni amerikan përbëhej nga i dërguari special Steve Ëitkoff dhe dhëndri i presidentit Donald Trump, Jared Kushner. “Sot u zhvilluan disa raunde takimesh. Pikëpamjet dhe shqetësimet tona u shprehën në një atmosferë shumë pozitive”, shtoi Araghchi, sipas Iran International.

“Bisedimet nisën pas tetë muajsh të trazuar”, tha Araghchi, duke përmendur ndërprerjen e negociatave gjatë konfliktit mes Iranit dhe Izraelit në qershor 2025. “Pas luftës 12-ditore, u shfaq mosbesimi dhe kjo përbën një sfidë në rrugën negociuese. Së pari duhet të kapërcejmë këtë mosbesim dhe të përcaktojmë një kuadër për negociatat”, deklaroi shefi i diplomacisë iraniane, duke shtuar se “nëse kjo qasje dhe perspektiva e palës tjetër vazhdojnë, mund të arrijmë një kuadër për negociatat”. Sa i përket mundësisë që bisedimet të vazhdojnë në ditët në vijim, Araghchi tha se “vazhdimi i negociatave do të varet nga pala tjetër dhe, natyrisht, nga vendimet e marra në Teheran”.

Irani është “gati” të mbrohet nga “çdo kërkesë e tepruar ose aventurizëm” nga ana e Shteteve të Bashkuara, deklaroi Araghchi. “Republika Islamike përdor diplomacinë për të mbrojtur interesat kombëtare të Iranit”, tha Abbas Araghchi gjatë një takimi me homologun e tij oman, Badr al-Busaidi, përpara fillimit të bisedimeve. Irani është “gati të mbrojë sovranitetin dhe sigurinë kombëtare të vendit nga çdo kërkesë e tepruar ose aventurizëm” nga SHBA-ja, shtoi diplomati.

Kina deklaroi se mbështet Iranin në mbrojtjen e interesave të tij dhe kundërshton “intimidimet e njëanshme”, ndërsa në Muskat nisën bisedimet mes Teheranit dhe Uashingtonit për programin bërthamor të Republikës Islamike.

Pekini “mbështet Iranin në ruajtjen e sovranitetit, sigurisë, dinjitetit kombëtar dhe të drejtave e interesave të ligjshme”, thuhet në një deklaratë të Ministrisë së Jashtme kineze, duke shtuar se “kundërshton intimidimet e njëanshme”. Zëvendësministrat e Jashtëm Miao Deyu dhe Kazem Gharibabadi u takuan dje në Pekin, ku diplomati iranian informoi Miao-n për situatën e brendshme të vendit të tij.