Piknik në gryka dhe kroje
Të rinjtë mund të kënaqen me një piknik në Grykën e Zezë, një grykë më lumin Zezës. Ajo është e ngushte në faqet e saj ka guva karstike. Peizazhi nga kjo pikë në anë të malit të Krujës është mjaft I bukur dhe joshës në pranverë.
Më e famshme se gryka e Zezë, është ajo e Vajës, apo sic e njohim të gjithë Shkëmbi I Vajës. Sipas legjendës pas pushtimit të Krujës më 16 qershor 1478, rreth 90 gra e vajza krutane, për të mos rënë në duart e turqve, u kapën dorë për dore dhe u hodhën nga shkëmbi me lartësi deri 200 m. Pas kësaj krutanët hidhnin lule nga ky shkëmb dhe vajtonin, duke bërë që vendi të merrte emrin Shkëmbi i Vajës. Ai gjendet në pjesën veriore të malit të Krujës. Edhe këtu mund të gjenden gropat karstike dhe në shtratin e përroit ka pellgje me ujë të pastër.
Rrepet shekullorë të Krujës
Kur vera shtrëngon me vapën e saj, hijet e pemëve janë më të dëshiruara se kurrë. Në rrethin e Krujës, mund të zgjedhësh disa vende me bukuri natyrore dhe hije të moçme, përsa kohë që bëhet fjalë për rrepe të vjetër dhe me përmasa të mëdha. Mu në pjesën veriore të kalasë mund të shijoni hijen e rrapit të Taslloit, pasi të keni bërë një shëtitje në pazarin e vjetër. Aty mund të pini ujë në burimin që nuk shterron as në verë. Prej rrapit ju mjafton të ngjisni disa shkallë të vogla për tu gjendur në brendësi të kalasë. Gjerësia e trungut arrin deri në 1,5 metra.
Rreth 5 kilometra më larg gjendet rrapi i Bretit, me lartësi 20 metra dhe diametër të trungut plot 4 metra. Mendohet se ky rrap është 800 vjeçar.
Për të parë një tjetër monument të natyrës siç është Rrapi i Buranit ju duhet të udhëtoni me makinë në rrugën Krujë- Nikël- Buran për të gjetur një pemë 400 vjeçare. Nën hijet e saj mund të pushoni pa frikë edhe pse diametri trungut të saj nuk është më i madh se 1.5 metra.
Rrepet e Arramerasit, janë grupe drurësh, pranë fshatit Arrameras, në të djathtë të rrugës automobilistike Kamëz – Fushë- Krujë. Lartësia e drurëve i kalon 20 metrat, ndërsa trungjet kanë diametër 1 – 1,3 m. Drurët më të vjetër janë dëmtuar e prerë. Mbetjet e trungut të tyre tregojnë se diametri ka qenë rreth 2 metra.
Së fundi në pasurinë e natyrës së rrethit të Krujës është edhe Selvia e Teqesë, një dru i veçantë në krahasim me te tjerët. Ndodhet pak më në veri të Fushë- Krujës. Pranë këtij monumenti është Teqeja me ndërtimi e së cilës është lidhur edhe historia e kësaj peme. Banorët e quajnë ndryshe qiparisi i Teqesë. Lartësia e selvisë është rreth 25 metra dhe mosha e saj mund të jetë mbi 500 vjeçare.
(Marre nga suplementi "Fundjava" e gazetes Shqiptarja.com )
(sg/shqiptarja.com)
![](https://www.shqiptarja.com/template/img/sh_logo1.png)