Kthehen mbi 4 mijë azilkërkues
kosovarë nga kampet e Hungarisë

PRISHTINË - Azilkërkuesit kosovarë, të cilët prej 6 muajsh në masë të madhe kanë marrë rrugët e Evropës ka gjasë të jenë pre e grupeve kriminale. Tashmë kanë filluar hetimet për t’i rënë nga pas këtij rrjeti kriminal, ndërsa janë mbi 4 mijë kosovarë, të cilët gjenden në kampet e Hungarisë, së shpejti do të kthehen në Kosovë.

Siç bën të ditur "Koha Ditore", me iniciativën e ministres së Integrimit të Kosovës, Vlora Çitaku sot u mbajt takimi bashkrendues me institucionet përgjegjëse për luftimin e kontrabandimit me qenie njerëzore. 

Në takim morën pjesë ministri i Punëve të Brendshme, Bajram Rexhepi, kryeprokurori i shtetit, Ismet Kabashi, drejtori i policisë së Kosovës, Shpend Maxhuni dhe udhëheqësi i Divizionit Ekzekutiv i EULEX-it.

Në takim u diskutua shqetësimi i përbashkët rreth rritjes së numrit të azilkërkuesve nga Kosova, të cilët janë duke e shfrytëzuar territorin e Serbisë për të kaluar në mënyrë të parregullt kufirin hungarez. Ministrja e Integrimit, Vlora Çitaku i ka shuar të gjitha shpresat e atyre, të cilët kanë mësyrë rrugët e Evropës apo që ende po bëjnë plane të ikin nga vendi. 

Ajo tha se azili nuk është më opsion dhe se qytetarëve të Kosovës nuk u jepet më azil në vendet e BE-së, ndërsa tha se azili është armiku numër një i liberalizimit të vizave për Kosovën. Ajo u ka bërë thirrje të gjithëve, që të mos bien pre e grupeve kriminale, duke rrezikuar jetën e tyre. Kurse, sipas ministrit të Brendshëm, Bajram Rexhepi ajo që po u lehtëson punën migrantëve kosovarë është se tani mund të lëvizin vetëm me letërnjoftime nëpër Serbi dhe kostoja e këtij udhëtimi dhe vajtja deri në Hungari është shumë e lirë.

Ndërkohë, qysh të enjten nga Austria pritet të vijë autobusi i parë me të kthyer nga ky shtet. Për t’i pritur ata do të dalë ministrja Çitaku bashkë më ambasadorin austriak. Në takim, sipas komunikatës,  u konstatua se personat që bien pre e mashtrimeve, rrezikojnë sigurinë e tyre personale, shpenzojnë mjete të panevojshme dhe përfundojnë në qendra për azilkërkues, të cilat në një afat shumë të shpejtë do të riatdhesohen në Kosovë dhe do t’ju ndalohet hyrja në zonën Shengen për 3-5 vitet e ardhshme.

Drejtori i Policisë së Kosovës, Shpend Maxhuni njoftoi të pranishmit që tashmë kanë nisur disa hetime, të cilat kanë për qëllim hetimin dhe arrestimin e atyre që ofrojnë shërbime të kontrabandimit, por edhe të atyre që e nxisin këtë proces.

Nga EULEX-i u kërkua që të ketë një bashkëpunim të ngushtë me institucionet e BE-së si Europol dhe të sigurohet bashkëpunim i afërt me institucionet e Kosovës, Serbisë, por edhe shteteve anëtare të BE-së për ta luftuar së bashku këtë dukuri, e cila është pjesë e krimit të organizuar.

Redaksia Online
(mag/shqiptarja.com)