Kujtohet 50 vjet krijimtari e regjisorit 
të “Kapedanit”, Fehmi Hoshafi

Me rastin e 80-vjetorit të lindjes së regjisorit Fehmi Hoshafi, më 28 shtator, AQSHF në bashkëpunim me FMAA organizon një aktivitet në nderim të krijimtarisë së tij artistike. I titulluar “Fehmi Hoshafi, 50 vjet krijimtari artistike” aktiviteti sjell dëshmi të rralla dhe detaje të punës me filmin nga vetë regjisori Hoshafi dhe kolegë të tij kineastë, por dhe kolazh me episode të filmave të realizuar e përgatitur nga AQSHF.

Janë 30 vjet pune pranë Kinostudios me realizimin e filmave artistikë dhe dokumentarë, me regjitë dhe përgatitjene e skenarëve, por edhe krijime letrare të botuara në këto 20 vitet e fundit. Fehmi Hoshafi u lind në Tiranë më 28 Shtator 1934. Filloi të punojë në kinematografi si asistent i regjisorëve veteranë Hakani dhe Dhamo, në filmat e tyre “Toka jonë”, 1964; “Vitet e para”, 1965; “Oshtimë në bregdet”, 1967; “Gjurma”, 1970.

Në vitin 1968 realizoi vetë spektaklin Estrada në Ekran, i cili u xhirua nga Kinostudioja në formën  e një filmi artistik. Prej suksesit që pati ky film, iu besua më vonë, në vitin 1972, regjia për kinokomedinë aq të dashur “Kapedani”, të cilin e realizoi së bashku me regjisorin Muharrem Fejzo. Ky film shënon lindjen e kinokomedisë në kinematografinë shqiptare e që u pasua më vonë me kinokomedi të tjera po aq të dashura nga regjisori Hoshafi si “Ëndërr për një karrige”,1984, “Zëvendësi i grave”, 1987, etj. Në periudhën 1976-1990 realizon edhe filma të tjerë artistikë dhe dokumentarë, ndër të cilët, filmi “Shoku ynë Tili”, që nderohet me çmim në Festivalin Ndërkombëtar për Fëmijë e të Rinj, Giffoni, në Salerno, Itali.

Fehmi Hoshafi emigroi në Greqi në vitin 1995, ku pas kësaj periudhe ai nisi të shkruajë dhe botojë disa libra.  


Shkrimi u publikua sot(26.09.2014) në gazetën Shqiptarja.com(print)