Kukësi i jep lamtumirën Europës
Mundet edhe në Poloni nga Legia

Shuhet ëndrra evropiane për ekipin e Kukësit. Nën kampionët e Shqipërisë humbën edhe ndeshjen e kthimit në Poloni përballë Legias së Varshavës me rezultatin 1-0 duke e mbyllur në total këtë tur 4-0.

Edhe pse shpresa nuk kishte shuar plotësisht para udhëtimit në Poloni, eliminimi i Kukësit u vendos nga Komisioni i Disiplinës dhe Etikës në UEFA pas incidenteve në ndeshjen e parë të zhvilluar në stadiumin kombëtar në Tiranë, ku lojtari i Legias,

Duda u godit në kokë në minutën e 52 duke sjellë më pas edhe ndërprerjen e ndeshjes  nga zyrtarët, pasi u gjykua se nuk ishin kushtet e nevojshme për të vazhduar. Përsa i përket kronikës së ndeshjes, pjesa e parë u mbyll me rezultatin e bardhë pa gola.

Kukësi tentoi disa herë për të kaluar në avantazh, por miqtë nuk u treguan të saktë para portës mike duke humbur disa raste. Me fillimin e pjesës së dytë ekipi vendas, i Legias shënoi me Michal Kucharczyk 47’, pas inkursioni të një lojtari vendas nga e djathta.

Kucharczyk gjuajti me qetësi në drejtim të portës nga pika e bardhë pas çorientimit të mbrojtjes mike.

Për t’u theksuar në këtë ndeshjen ishin edhe koret raciste të tifozëve vendas ndaj shqiptarëve.

Tifozët e Legias njihen si shumë problematikë dhe të dhunshëm, jo vetëm në ndeshjet brenda, por edhe jashtë si në rastin e Tiranës ku provokuan pa fund.

Por tashmë, vëmendja nuk është më te eliminimi i Kukësit, por e ardhmja e e Presidentit Safet Gjici, i cili para ndeshjes deklaroi në media, se nëse ekipi nuk kualifikohet në Poloni mund të largohet për të marrë presidencën e një tjetër ekipi në kampionatin shqiptar të futbollit.

Tashmë pritet që të shikohet se çfarë do të vendosë biznesmeni.

Shanset më të mëdha janë që Gjici të marrë drejtimin e ekipit të Vllaznisë së Shkodrës, dëshirë e shprehur hapur në media disa herë, por që një lëvizje e tillë do të jetë e vështirë.