Kullat e vrojtimit në liqenin e Pogradecit të boshatisura, pushuesit: Nuk ka siguri, kemi frikë për fëmijët

Edhe pse sezoni turistik veror në qytetin e Pogradecit është çelur, pushuesit po e frekuentojnë plazhin pa praninë e rojeve bregliqenore. Kullat e vrojtimit të ngritura përgjatë vijës së bregut të liqenit, janë të boshatisura nga rojet, duke mos ofruar shërbimin e domosdoshëm të sigurisë ne plazh. Sipas pushuesve mungesa e rojeve dhe mungesa e kufizimit të zonës në të cilën bëhet notimi, bëjnë që siguria në plazh të jetë zero.

"Siguria është zero. Ajo është kryesorja, kulla është, por s'ka njeri aty. Një fëmijë mund të gaboje." thotë një pushues.

"Mungojnë rojet e sigurimit. Sa kam qëndruar këtu skam parë asnjë roje. Fëmijët janë në rrezik." thotë një tjetër pushues.

"Bashkia duhet të marre masa se ka fëmijë që futen në ujë, nuk ka as sinjalistikë ujore që tregon deri ku të shkojmë" shprehet pushuesi.

"Vij nga Greqia, Selaniku. Vij vetëm për plazh por kam frikë për fëmijët." thotë pushuesi.

Ka dhe nga ata të cilët edhe pse adhurojnë bukurinë pogradecare, kanë vendosur të ndërpresin pushimet në këtë plazh për shkak të sigurisë.

"Sa erdha, gjënë e parë që pashë ishte nëse ka  mbrojtje për njerëzit. Këtu është një kullë vrojtimi, por nuk funksionon.  Deti është mbushur plot me fëmijë. Pogradeci është i bukur , liqeni është i bukur. Këtu ka plazhe shtetërore, por s’ka siguri. Më pëlqen Pogradeci, por s'ka siguri, kështu që nesër do të iki." tregon ai.

Ndërkohë që në mbledhjen e Task-Forcës së turizmit në Pogradec ditën e shtunë, ministri i Turizmit dhe Mjedisit, Blendi Klosi u shpreh se nga 50 subjekte që shfrytëzojnë hapësirën e bregdetit, vetëm 14 i zbatojnë të gjitha kriteret për stacionet e plazheve. Ndërsa paralajmëroi se të gjithë ato subjekte që nuk zbatojnë ligjin do të ndëshkohen me gjobat përkatëse.

/r.k./Shqiptarja.com

TAG:
• Liqeni i Pogradecit
• sezoni turistik
• pogradec
• rojet bregdetare
• pushuesit