Rezistenca e banorëve të fshatrave të njësisë Suç kundër ndërtimit të një hidrocentrali në zallin e “Lusës” është zhvendosur këtë të hënë në dyert e Bashkisë së Klosit.  Dhjetra banorë u dyndën në ambientet e Bashkisë Klos, duke këmbëngulur të takojnë kryetaren e bashkisë Valbona Kola. Ata kërkojnë pezullimin e menjëhershëm të punimeve për ndërtimin e HEC-IT.

Banorët shprehen se do ta mbrojnë me çdo çmim zallin e Lusës, me ujin e të cilit vadisin tokat bujqësore.

“Deputeti i zgjedhur i PS Agron Malaj na kishte premtuar se do anulohej leja, por nuk e beri. Ju si kryetare na thoni beni peticion por a ka peticion më të madh se kjo protestë?! Ju keni qenë dhe në dëgjesë publike ndërsa tani kërkoni anën formale?! Unë si kryeplak në emër të banorëve kërkoj: Të pezulloni menjehere punimet për HEC-in”, tha kryeplaku i fshatit.

Pas rezistencës së banorëve të cilët nuk u larguan nga ambjentet e bashkisë edhe pas ndërhyrjes së policisë, kryebashkiakja degjoi shqetesimin e tyre.  Ajo premtoi se se shpejti do të zhvillohet një takim me perfaqesuesit e kompanise.  

"Sot kishim planifikuar një takim mes kryepleqtë, përfaqësuesve të kompanisë së HEC-it dhe bashkisë. Për shkak se ju erdhën në këtë formë (me protestë) ata (kompania) u tërhoqën nga ky takim dhe thanë se do të vijnë në moment më të qetë. Punimet janë të pezulluara derisa ky takim të realizohet”, tha Valbona Kola, Kryetare e Bashkisë Klos.

Nga ana tjetër, banorët i kërkuan kryebashkiakes të lërë mandatin nëse ndjehet e pafuqishme të mbrojë kauzën e tyre.

“Ne do ta mbrojmë lumin deri në vdekje! Thonë se lejen e ka dhënë Belinda Balluku. Ne i bejme thirrje ta anuloje mjehere! Po cënoni ujin e pijshëm, ujin e vaditjes, e gjithcka. Kjo bashki të mendohet mirë, kush ka bërë dallavere të largohet se kjo bashki është e popullit jo e maskarenjve”, tha nje banor.

Prej nje jave banoret e 7 fshatrave te njesise administrative Suç kanë protestuar, kundër ndërtimit të hidrocentralit, ku ka pasur dhe banore te proceduar penalisht për shkak të përplasjes me punëtorët e kompanisë. Banorët kërkojmë që pasi të pezullohen punimet, SPAK-u të hetojë, pasi sipas tyre, leja është dhënë në kundërshtim me ligjin, nga Ministria e Infrastrukturës. 

 

Rendit zhvillimet sipas orarit:
Ora 21:36
Protesta kundër HEC-it në Klos, deputeti Malaj: E habitshme, po protestojnë ish zyrtarët e PD që miratuan kontratën me kompaninë

1751917357_klos.jpg

Deputeti i Partisë Socialiste Agron Malaj, ka reaguar pas protestës së zhvilluar sot para Bashkisë Klos, lidhur me ndërtimin e HEC-it nga kompania “Global Interpace Grup sh.p.k.” me administrator Ashim Doma. Në një deklaratë publike, Malaj ka shprehur mbështetjen e tij për banorët e Njësisë Administrative Suç-Kurdari, duke theksuar se “uji për këta njerëz punëtorë dhe bujarë është vetë jeta”.

Megjithatë, ai nuk ka fshehur habinë për pjesëmarrjen në protestë të një deputeteje të Partisë Demokratike, duke e akuzuar se ose nuk njeh historinë e partisë që përfaqëson, ose po përpiqet ta mohojë atë. Sipas Malajt, kontrata për ndërtimin e HEC-it është miratuar më herët nga ish-kryetari demokrat i Bashkisë Klos, Basir Çupa, ish-kryetarja e Këshillit Bashkiak Zana Elezi dhe ish-administratori i Njësisë Suç-Kurdari, Ilir Çeliku – të gjithë anëtarë të kryesisë së PD-së.

“Për ironi të fatit, janë pikërisht këta që tani protestojnë para bashkisë për një kontratë që e kanë firmosur vetë,” deklaroi Malaj, duke shtuar se “ose nuk dinë çfarë bëjnë, ose po përpiqen të mashtrojnë qytetarët me maskarada politike”

Reagimi i plotë e deputetit Agron Malaj: 

Sot ndoqa me vemendje protestën e zhvilluar para Bashkisë Klos lidhur me ndërtimin e Hec Global Interpace Grup sh.p.k (administrator Ashim Doma). 
Që në krye të herës dua të shpreh mbështetjen time për popullin e Njësisë Administrative Suç-Kurdari. Uji për këto njerëz punëtore dhe bujarë është veta jeta. Por, smund të fsheh habinë time kur pashë deputetën e Partisë Demokratike të dalë nga votat e Dibrës që ose nuk njeh historinë e partisë që përfaqëson ose në rastin më të mirë përpiqet ta mohojë atë. 

Deputetja kërkon të bëjë përgjegjëse Kryetaren aktuale të Bashkisë Klos për kontratën e miratuar nga ish-kryetari i kësaj bashkie, demokrati Basir Çupa, bashkë me Zana Elezin, ish-kryetaren e Këshillit Bashkiak dhe Ilir Celikun, ish -Administrator i Njësisë Suc- Kurdari. Për ironi të fatit këta persona, anëtarë të kryesisë së PD-së na zhvillojnë protesta para bashkisë për një kontratë që e kanë firmos po vetë. 

Tani këta ose nuk dinë çfarë bëjnë ose duan të tallin e gënjejnë popullin me maskarada të tilla. 
Nëse synojnë këtë të dyten, më vjen keq ti zhgënjej por klosianët i njohin mirë dhe nuk i hanë dokrrat e tyre.

K.M/Shqiptarja.com