Kurti: Mbetem i përkushtuar në dialog, por duhet të ketë sundim të ligjit në Kosovë! Ndërkombëtarët na premtuan pjesëmarrjen e Listës Serbe në zgjedhje

 

Kryeministri Albin Kurti tha se është i përkushtuar në dialogun me Serbinë nëse do të ketë një rinisje, por shtoi se nuk mund të bënte kompromis sa i takon sundimit të ligjit në Kosovë. Ai tha se zvogëlimi i pranisë së policisë në ndërtesat komunale, do të bëhet kur të jetë garantuar sundimi i ligjit dhe arrestimi i ekstremistëve që shkaktonin trazira.

“Në dialog jam i gatshëm dhe i përkushtuar por në Kosovë duhet të ketë ligj dhe kushtetutë. Ju i keni dëgjuar 5 pikat për bindjen tonë të fuqishme. Vetëm kur ne të kemi sundim të ligjit që i largon këta ekstremistë do mund të zvogëlonim praninë e policisë sonë në ndërtesa komunale. Nuk kemi ne faj që Beogradi e kërcënon apo i bën oferta që 2 ditë para zgjedhjeve të tërhiqet nga gara. Aleksandër Jabllanoviç doli nga fushata, ka qenë fituesi i sigurtë. Ndërkombëtarët të merren me këtë. Edhe ai të ishte kryetar komune, njësoj do ta mbroja me polici nga sulmet e atyre ekstremistëve të dhunshëm që nuk i barazoj me komunitetin serb. Madje serbët janë në hall me ta. Krimi ka emra të personave të veçantë jo të një komuniteti. Dhuna më e madhe është bërë në Zveçan ku nuk ka pasur kryetar fare aty. Nuk ka të bëjë me kryetarin kjo gjë”-tha Kurti.

LEXO EDHE:
Dy ‘kryeveprat’ e Kurtit: Thaçi e UÇK në Hagë dhe izolimi i Kosovës

Mes të tjerash, ai shtoi se në 17 mars, ndërkombëtarët e patën siguruar se do të bindnin Listën Serbe të hynte në zgjedhje për komunat në veri nëse do të zgjatej afati për regjistrim. Kreu i ekzekutivit tha se nuk mund të bënin që Lista Serbe të merrte pjesë me pahir në zgjedhjet e zhvilluara.

“Më 17 mars neve ndërkombëtarët na premtuan, nëse bëhet aneksi i zbatimit në Ohëri u garantojmë se Lista Serbe merr pjesë në zgjedhje. Unë kam qenë i gatshëm që Lista Serbe të merrte pjesë në zgjedhje, dhe u zgjat afati i regjistrimit në zgjedhje. Pavarësisht kësaj Lista Serbe nuk aplikon për t’u regjistruar, tani çfarë të bëjmë ne? Nuk i marrim dot me zor t’i fusim në zgjedhje. Ndërkombëtarët na patën premtuar se do e zgjidhnin këtë”-shtoi Kurti.

Lajmi kryesor:

Rrëmbimi i 3 policëve të Kosovës, SHBA kërkon lirimin pa kushte! KFOR i përgjigjet Kurtit: S'ishim në zonën ku u arrestuan, palët të ulin tensionet

B.V/r.k./Shqiptarja.com

TAG:
• kosove
• Albin Kurti
• rrembehen policet ne kosove
• tensione ne veri te kosoves