TIRANË- Djali i të ndjerit, Sokol Olldashi, Glauk Olldashi në një internistë për Report Tv e ka cilësuar Kuvendin e Sali Berishës si të “domosdoshëm”, ku ka prevaluar transparenca për ndryshimet në statutin e PD si edhe shkarkimin e Lulzim Bashës. Ai e ka cilësuar Kuvendin e 18 dhjetorit, si të turpshëm e që nuk duhej që demokratët të arrinin deri në ndarjen e tyre.

“Ishte një Kuvend ku mbi të gjitha transparenca prevalonte dhe besoj se nuk ka nevojë për fjalë se aty çdo gjë shihej me sy. Aprovimet e anëtarësisë nen për nen nuk bëhen me votim të fshehtë se është fizikisht e pamundur, pra votimi me ngritje dore është mënyra e vetme që mund të bëhet. Gojët e liga do të flasin gjithmonë.

Vendimin e merr Këshilli Kombëtarë dhe anëtarësi, duke qenë se jemi ende në numërim, nuk mund t’i themi vendim se është duke u numëruar, fjala e sovranit do të na tregojë.

Referendumi është referendumi i të gjithë anëtarësisë. Ai kuvendi nëse do ishte sic u thirr në fillim me kërkesë të kryetarit do ishte në rregull, por ai Kuvend degradoi në një Kuvend ku elementë të caktuar kapnin lloj e soj dhe i thonin firmos. E turpshme, jo vetëm ata, por për të gjithë demokratët, nuk duhej arritur deri në këtë pikë. Secili që mendon veten të aftë për ta ushtruar funksionin e kryetarit të PD është i lirë të kandidojë, në fund të ditës vota është ajo që vendos çdo gjë”, tha Olldashi në Report Tv.  

Ai ka sqaruar edhe “incidentin” që ndodhi me hyrjen e tij në Kuvendin e Sali Berisha.

“Nuk ka pasur asnjëlloj incidenti, kam qenë te hyrja e delegatëve dhe shkova për të çuar diçka që mungonte dhe kisha parkuar makinën keq dhe erdha dhe u ktheva për të rregulluar makinën, nuk është se nuk më lanë të hyja”, tha Olldashi.