Kreu i Grupit Parlamentar të Partisë Demokratike, Gazment Bardhi, ka hedhur akuza të forta ndaj kreut të ri të SPAK, Klodian Braho, pas mos-dërgimit të një kërkese të re në Kuvend, për arrestimin e ish-zv.kryeministres Belinda Balluku.

Komentet Bardhi i bëri gjatë një konference për mediat, teksa u pyet nga gazetarja e Report Tv Danjela Maloku lidhur me çështjen, pas dërgimit ditën e djeshme të dosjes ‘Balluku’ në Gjykatën e Posaçme.

Bardhi tha se Brahos duket se i intereson më shumë opinioni i Taulant Ballës dhe eksponentëve të tjerë të PS për çështjen, sesa opinioni i 5 anëtarëve të tjerë të Këshillit.

Ai shtoi se duke mos dërguar një kërkesë të re për arrestimin e Ballukut, SPAK nuk i ka hequr alibinë kryeministrit Edi Rama, i cili argumentonte sipas tij se akuza fillestare ka qenë e papërshtatshme për dhënie autorizimi për arrestimin e saj.

Në përfundim Bardhi akuzoi kreun e SPAK për hapjen e 3 çështjeve me fraksion për Ballukun, që sipas tij ka si qëllim mbylljen e hetimeve.

“Faktin që SPAK do të mbyllte në mënyrë gjysmake hetimet dhe do të çonte dosjen në gjykatë e kam paralajmëruar nga kjo sallë më herët. Ndaj Ballukut janë shtuar akuza shumë të rënda, ndoshta akuzat më të rënda ndaj ndonjë zyrtari të lartë publik, drejtuesi i SPAK kishte refuzuar dhe do të refuzonte që t’i ridrejtohej Kuvendit të Shqipërisë me një kërkesë të re për heqjen e imunitetit. S’e kisha imagjinuar kurrë që Braho dhe 2 prokurorët e çështjes do dilnin hapur për gazetarët dhe ta pranonin... Pse për Klodian Brahon vlen më shumë opinioni i profesor Taulant Ballës, Niko Peleshit, Bledi Çuçit sesa opinioni i 5 anëtarëve të tjerë të Këshillit? Po si mund të dalë një prokuror i republikës dhe të thotë ‘unë do ta lexoj ligjin me syzet e Ballës’. Po si mund të thotë një prokuror i republikës që ‘unë nuk do ta arrestoj Ballukun?’. Rama ka argumentuar se për veprën ‘shkelje e barazisë në tendera’ që rëndonte mbi Ballukun, ka qenë e papërshtatshme dhënia e autorizimit për arrestim. Po tani, pse nuk aktivizohet prokuroria? Ku ndodhet kutia e kuqe me euro që u kap në vilën e Ballukut? A u janë kthyer ato shqiptarëve? Kanë hapur 3 çështje me fraksion për Ballukun. Aeroporti i Vlorës ka një dëshmi publike. Se ky kreu i ri i SPAK është mjeshtër për ndarjen e çështjes në fraksione që më pas të mbyllë hetimet”, tha mes të tjerash Bardhi.

Lajm në përditësim...

Rendit zhvillimet sipas orarit:
Ora 12:18
Buxheti 2027/ Bardhi paralajmëron votën kundër të PD-së në Kuvend: Manovër diabolike që bën sikur ul taksat, por merr më shumë para nga xhepat e shqiptarëve

1794910294_gazmentbardhi.JPG

Kryetari i Grupit Parlamentar të Partisë Demokratike, Gazment Bardhi, ka paralajmëruar se PD do të votojë kundër miratimit në parim të pr.buxhetit të vitit 2027, në seancën plenare të së enjtes.

Në një konferencë për mediat, Bardhi e ka cilësuar buxhetin e vitit 2027 si buxhet i korrupsionit, jo i shqiptarëve.

“Ky buxhet është vetë Edi Rama. Një manovër diabolike që bën sikur ul taksat dhe bën sikur shpërndan mirëqenie, por realisht i rrit taksat dhe në fund, nuk lë më shumë para në xhepat e shqiptarëve. Shqiptarët nuk marrin më shumë para nga puna e tyre, sepse thelbi i këtij buxheti nuk është sa para do t’i mblidhen shqiptarëve: 8, 9 apo 10 miliardë. Thelbi është kush do t'i shpenzojë këto para dhe në xhepat e kujt do të përfundojnë. Protestat e studentëve, kërkesa për dorëheqje e Edi Ramës si i korruptuar tregojnë se shqiptarët e dinë përgjigjen: buxheti 2027 nuk është buxheti i tyre, por i korrupsionit. Buxheti i Edi Ramës me një dorë jep pak, me tjetrën merr akoma më shumë. Qershia mbi tortë e këtij buxheti diabolik që jep pak me një dorë dhe merr shumë me dorën tjetër të korruptuar të Edi Ramës, është futja në skemën e TVSH-së e bizneseve me xhiro vjetore mbi 5 milionë lekë, përfshirë mijëra biznese të vogla dhe profesionistë të lirë”, tha mes të tjerash Bardhi.