Kuvendi miraton pr/buxhetin 2013
Opozita: Buxheti i asfaltit e betonit

Me përplasje dhe akuza është miratuar në votimin e parë Projektbuxheti për vitin 2013, që planifikohet të jetë 1.586 miliardë euro. Qeveria e ka vlerësuar si buxhet të zhvillimit ekonomik, ndërkaq partitë opozitare e quajtën buxhet të asfaltit dhe betonit. Në kampin opozitar vetëm AAK’ja i doli në krah pozitës me disa kushte.

Pavarësisht se kaloi në votimin e parë, Projektbuxheti për vitin 2013 nga partitë opozitare u cilësua si më i keqi në këto vitet e fundit. Derisa Qeveria e Kosovës e vlerësoi si buxhet të zhvillimit ekonomik, nga opozita e quajtën buxhet të asfaltit dhe betonit.

Përkundër përplasjeve buxheti u votua me 62 vota për, 31 kundër dhe një abstenim, projektbuxheti për vitin 2013, që parashihet të jetë 1.586 miliardë euro.

Lidhja Demokratike e Kosovës dhe Lëvizja Vetëvendosje kundërshtuan këtë projektbuxhet, ndërsa AAK-ja i ka dhënë mbështetje pozitës, por me disa kushte. Ministri i Financave, Bedri Hamza, duke iu drejtuar deputetëve, kërkoi nga ta që mos ta shohin si një projektbuxhet për vitin 2013, por edhe për vite të tjera. Ai tha se rritja ekonomike për vitin 2013 do të jetë 4.5 për qind.

Shefi i Grupit Parlamentar të Lëvizjes Vetëvendosje, Visar Ymeri ka thënë se ende po varemi nga importet dhe bëhet fjalë vetëm për një buxhet shpenzues. “Ky është buxhet i cili nuk ka fare koncept të zhvillimit, ky është një buxhet i asfaltit e betonit, e jo buxhet i investimeve në sektorët prodhues. Zhvillimi ekonomik i Kosovës, duhet ta dimë të gjithë, vjen nga investimet në prodhim, nga hapja e vendeve të punës në bujqësi, në energji e industri”, tha Ymeri.
(sg/shqiptarja.com)