Kyç apo këmbë e ndrydhur? Ja hapat e parë që duhet të kryeni menjëherë për të parandaluar komplikacionet sipas specialistit Ylli Merja

Në rubrikën “Bima dhe Shëndeti” në emisionin e mëngjesit “Rreze Dielli” në Report TV me specialistin e bimëve mjekësore Ylli Merja flasim për ndrydhjet e artikulacionit në këmbë apo kyçe, cilat janë hapat e parë që duhet të kryeni menjëherë në mënyrë për të parandaluar komplikacionet.

Pak prej nesh kanë kaluar jetën pa ndrydhur njëherë kyçin e këmbës. Ndrydhjet janë ndër dëmtimet më të zakonshme muskulore në njerëz të të gjitha moshave, dhe kyçet e këmbëve janë veçanërisht të prekshme për shkak të madhësisë së vogël të nyjës dhe forcave të ushtruara mbi to kur trupi është në lëvizje.

Sipas specialistit Ylli Merja ndrydhja është një dëmtim i ligamenteve që mbajnë kaviljen. Ligamentet në pjesën e jashtme të kaviljes janë ato që dëmtohen më shpesh kur këmba gjatë lëvizjes ndrydhëse rrotullohet nga brenda. Ndrydhja e artikulacioneve, si të kyçit të dorës apo të këmbës, nuk është një problem serioz shëndetësor, pasi mund të kalojë edhe pa marrë trajtim të specializuar, por është aq shqetësues sa nuk mund të rrini pa bërë asgjë! Nëse do të veproni në kohë, nuk do të ndjeni dhimbje dhe ndrydhja nuk do të kalojë në komplikacione të tjera. 

Simptomat e një ndrydhjeje të artikulacionit janë:

·        Dhimbje të menjëhershme të forta dhe të padurueshme

·        Enjtje të artikulacionit, ndoshta dhe mavijosje

·        Kërcitje e fortë kyçesh të shoqëruara me dhimbje

·        Vështirësi për të mbajtur trupin në ekuilibër

·        Vështirësi për ecje

·        Hemoragji nën lëkurë

Shkallët e lëndimit të kyçit të ndrydhur mund të jenë të ndryshme: Shkalla e parë: nyja e lënduar ka enjtje të lehtë dhe dhimbje të lehta dhe shërohet për 3-4 ditë. Shkalla e dytë: nyja e lënduar ka filluar enjtjen, nuk ka nxirje, ecja realizohet me dhimbje. Shërohet për 7-8 ditë. Shkalla e tretë: kyçi enjtet shumë, ka nxirje nën lëkurë, ka dhimbje të forta dhe nuk lejon që të qëndrosh në këmbë. Shërohet për 15-25 ditë.

Çfarë duhet të bësh nëse pëson një ndrydhje? Sipas specialistit Merja hapi i parë është reduktimi i lëvizjes duke e mbajtur artikulacionin në qetësi. Duhet të vendosni akull për rreth 10-15 minuta çdo 2 orë. Mos e vendosni akullin në kontakt me lëkurën, pasi mund të shkaktojë djegie prej ftohjes. Mbështilleni akullin me një peshqir ose me një pecetë të lagur për të mbrojtur lëkurën. Më pas mbështjellim artikuacionin me një napë të lagur me uthull molle dhe ujë në raportin 1 me 1. E mbajmë më uthull molle 10-15 minuta. Bëni një masazh të lehtë me vajra bimore reumer, vaj livando dhe vaj ulliri ose vaj kokosi, livando dhe vaj dafine. Masazhimin bëjeni 2-3 herë në ditë. Pas masazhit grijmë një qepë të kuqe dhe një patate. Shtoni një lugë çaji kripë dhe përziejeni mirë. Vendoseni në nyjën e dëmtuar dhe mbështilleni me garzë. Lëreni 12 orë. 

Në rastin kur nyja është gjakosur ndjekim të gjitha hapat si më lartë dhe më pas do të përgatisim një mbështjellje të cilën do ta mbajmë për 3-4 ditë (kuptohet duke e rinovuar herë pas here). Marrim dy feta bukë të zezë, i lagim me verë të kuqe dhe fetat i bukës i shtypim si brumë dhe mbështjellim artikulacionin e dëmtuar. Kjo masë hollon gjakun, lehtëson qarkullimin e gjakut dhe rigjeneron shpejt tendinat dhe enët e dëmtuara.

Gjithashtu specialisti i bimëve mjekësore Ylli Merja rekomandoi një mëngjes të shëndetshëm për forcim kyçesh dhe tendinash me kos, musli, osteomer, boronicë dhe pak piper miks si dhe 2 çajra shumë efikas për qetësimin e dhimbjeve dhe forcimin e tendinave:

·        Në një litër ujë ziejni 2 minuta 1 dorë lule murrizi, 1 dorë bar blete, 4-5 akacie, 1 dorë tërfil. Pijeni këtë çaj 1 gotë 3 herë në ditë.

·        Hedhim në një kavanoz lule të njoma të akacies dhe disa feta limoni. Mbushim kavanozin me ujë të pijshëm dhe e lemë 3-4 ditë. Kullojeni dhe pijeni duke e ëmbëlsuar sipas dëshirës. Ky shurup përmban shumë vitaminë C, A, B, taninë dhe flavonoide.

MC/Shqiptarja.com

TAG:
• rreze dielli
• Bima dhe Shendeti
• ylli merja
• Ndrydhja e artikulacioneve