La fushën i dëmtuar, Myrto Uzuni qetëson Sylvinhon dhe tifozët e Kombëtares

Myrto Uzuni mund të jetë gati pas pak ditësh për t'u rikthyer sërish në fushë. Sulmuesi i Kombëtares ishte në fushë dje për Granadan, teksa ekipi i tij barazoi 1-1 me Betis në La Liga. Beratasi nuk mundi të qëndronte më shumë se 37 minuta në fushë, duke dalë i dëmtuar.

Pas një dyluftimi në mesin e fushës, 27-vjeçari vendosi këmbën e djathtë me forcë në tapetin e gjelbër, çka mund t'i ketë shkaktuar probleme në muskujt e barkut. Pas testimeve të sotme, duket se gjendja e tij nuk është serioze në lidhje me këtë lëndim dhe dalja nga fusha u bë për më shumë siguri.

Pritet që Uzuni të qëndrojë pushim në fundjavë, teksa do jetë gati për të tijtë vetëm pas pak ditësh. Kësisoj, sulmuesi do bashkohet edhe me Kombëtaren për ndeshjen e rëndësishme kundër Çekisë në 12 tetor në Air Albania.

Dueli që vlen për kualifikueset e grupit E të Euro 2024 është si një finale për tanët, që shpresojnë të shkojnë në "Gjermani 2024". Këtë sezon në La Liga, Uzuni ka luajtur në shtatë ndeshje për 578 minuta, duke shënuar dy gola.

S.DH/Shqiptarja.com

TAG:
• Legjionaret
• Myrto Uzuni
• la liga
• Granada
• kombetarja shqiptare
• euro 2024