“Një jetë a cappella”, recital
për dirigjentin Milto Vako

TIRANE- “Një jetë A Cappella” titullohet recital i korit të TKOB dedikuar dirigjentit Milto Vako me rastin e 85-vjetorit të lindjes. Koncerti do të zhvillohet më datë 22 mars dhe do të interpretojnë sopranot Emiljana Palushaj e Ermira Dauti, si dhe instrumentistët Aida Kasmi, Enalda Gjoni, Matilda Bajrami, Thanas Paskali bashkë me korin e TKOB-it të drejtuar nga dirigjenti Dritan Lumshi.

Programi përmban pjesë të kompozitores Dhora Leka, nga Fan Noli, Beko Zotin, Giuseppe Verdi, opera “La forza del Destino”, Mikel Koliqi, melodrama “Ruba e kuqe”, Thoma Simaku me “Moj e bukura more”, Pëllumb Vorpsi me “Peizazh”, Fatos Lumani me pjesën “Sa shumë letra malli”, Milto Vako me veprën “Bie lodra”, etj. Prof. Milto Vako u lind më 30 mars 1930. Ai është pjesë e atij brezi që identifikohet me ngritjen dhe zhvillimin e institucioneve muzikore profesioniste në Shqipëri.

Ai hyri në skenën muzikore të vendit që prej vitit 1959, i sapodiplomuar në dirigjim, në klasën e mjeshtrit të madh N. Sokolov, në Konservatorin P. I. Çajkovskij të Moskës. Pas afirmimit si dirigjent i korit në AKVP, në vitin 1962 Prof. Vako renditet ndër themeluesit e Konservatorit Shtetëror të Tiranës, ku së bashku me figura të tjera të njohura si A. Paparisto, Ç. Zadeja, H. Stringa, M. Krantja etj i dhanë jetë shkollës së lartë të muzikës në Shqipëri. Prej vitit 1990 Prof. Milto Vako është pedagog në Fakultetin e Muzikës së Universitetit të Arteve.


Shkrimi u botua në Shqiptarja.com (print) në 20 Mars 2015

Redaksia Online
(d.a/shqiptarja.com)