Projekti i cili ishte planifikuar të përfundonte në qershor të vitit të ardhshëm do të presë shiritin 6 muaj më herët për shkak të punimeve të përshpejtuara.
Drejtori i Agjencisë së Shërbimit të Sporteve, Bledar Doçi, në një intervistë për “Telesport” shprehet se impianti i ri do të jetë një risi për shumësportëshin, teksa zbulon se ideja është të inagurohet me një ndeshje basketbolli ndërmjet Shqipërisë dhe Kosovës.
“Pallati i ri i sportit do të jetë një ambjent modern i cili do të presë ndeshjet e kombëtareve tona të lojrave me dorë dhe jo vetëm si dhe ndeshjet e klubeve në kupat e Europës.
Mendohet të ketë rreth 1300 vende për spektatorët, mjaftueshëm duke parë se edhe në rajon ka palestra sportive që kanë kapacitete me vogla.”- u shpreh më tej Doçi.
Gjithashtu në katet -1 dhe -2 janë krijuar dy palestra force bashkëkohore për stërvitjen e peshëngritësve tanë. Pas përfundimit të fazës së parë, në fazën e dytë projekti parashikon të ndërtohet një pishinë e mbyllur olimpike, një pistë atletike me 8 korsi, dy fusha futbolli, si dhe dy fusha të hapura një për basketboll dhe tjera për tenis.
Redaksia Online
K.M/Shqiptarja.com