Situata paraqitet problematike edhe në qarkun e Lezhës. Dimri i ka gjetur shkollat të papërgatitura, megjithëse janë aplikuar zgjidhje emergjente, shpesh të paefektshme dhe të rrezikshme, si ngrohja me energji elektrike.
Nxënësit thonë se është e pamundur të zhvillohet normalisht procesi mësimor në temperatura të ulëta.
"Jam veshur trashë sepse në klasë është ftohtë. E kemi blerë me lekët tona ngrohësen, pasi shkolla nuk e ofron një mundësi të tillë. Ai që ka ftohtë nga duart të vijë të nxehet tek reflektori."- shprehen nxënësit.
Drejtoria Arsimore Lezhë i bën thirrje Bashkisë që të ndërhyjë në mënyrë urgjente, për të siguruar ngrohjen në shkolla.
"Eshtë një problem që ndikon mbi cilësinë e procesit mësimor. Bashkia është institucioni që duhet ta zgjidhë urgjent problemin e ngrohjes në shkolla."- deklaroi Bardhok Pulaj, Drejtor i Arsimit në Lezhë.
Mungesa e ngrohjes në shkolla është një problem I përvitshëm dhe që prek thuajsë gjithë vendin.
(er.nu/shqiptarja.com)