Aleksandër Lipivani është emëruar drejtor Ekzekutiv i Aviacionit Civil. Ky vendim në mbledhjen e sotme të qeverisë, e drejtuar nga kryeminsitri Edi Rama. Aleksandër Lipivani zëvendëson në këtë post Feliks Baçi.
 
Gjithashtu në mbledhjen e sotme të qeverisë është miratuar që në aeroportin “Nënë Tereza” të ndërtohet një tjetër sallë VIP, duke shkruar kështu numri në tre.
 
Sipas vendimit kjo sallë mund të rezervohet nga:  kompani të huaja apo vendase; ambasada të huaja rezidente apo jorezidente në Tiranë;  organizata ndërkombëtare dhe përfaqësi të biznesit vendas dhe të huaj;  sportistë që kanë fituar medalje në aktivitetet kombëtare apo ndërkombëtare. Rezervimi i kësaj  sale VIP në aeroportin “Nënë Tereza” bëhet jo më vonë se 48 orë përpara mbërritjes apo largimit të subjektit kërkues.

 “Albcontrol”, sh.a. ngarkohet me sigurimin e shërbimeve që do të ofrohen në sallën VIP nr.3. Këto shërbime përfshijnë: lejimin e hyrjes në zonën e parkimit VIP të automjetit me të cilin udhëton subjekti kërkues i shërbimit;  pritjen dhe akomodimin në sallën VIP nr.3; kontrollin dhe vulosjen e pasaportës;  transportin e bagazhit të dorës; ofrimin e shërbimit bufe, TV, internet dhe lehtësi të tjera.  Ky vendim hyn në fuqi pas botimit në “Fletoren zyrtare”.


Redaksia Online
(g.f/Shqiptarja.com)