'Lojtarët më të mirë nuk ëndërrojnë Arabinë', Ceferin: Klubet saudite nuk do luajnë kurrë në kupat evropiane

Shpërngulja e disa prej lojtarëve më të mirë nga Evropa drejt milionave të Arabisë Saudite nga sjellë ndryshimin e polit në futboll. Për këtë, në një intervistë të fundit, kreu i UEFA-s, Aleksandër Ceferin ka thënë se lojtarët më të mirë nuk ëndërrojnë të shkojnë në Arabi, por në Evropë.

Një mesazh i ka dërguar Ceferin edhe drejtuesve të ligës saudite, teksa asnjë ekip i këtij vendi nuk do jetë pjesë e kupave evropiane. Për L'Equipe, Ceferin krahasoi ligën saudite me atë kineze, e cila disa vite më parë tërhoqi disa yje, pothuajse të gjithë në fund të karrierës së tyre.

"Nuk paraqet rrezik. Kam parë se çfarë ndodhi në Kinë, ku lojtarët në fund të karrierës së tyre kishin zbritur në këmbim të shumë parave. Rezultati: futbolli kinez nuk u zhvillua dhe ekipi kombëtar nuk u kualifikua në Kupën e Botës. Në Arabinë Saudite ata duhet të punojnë në stërvitjen e lojtarëve dhe trajnerëve, por ky nuk është problemi im", tha kreu i UEFA.

LEXO EDHE:
Euro 2024/ Tjetër mundësi për tifozët e Kombëtares, UEFA nxjerr në shitje të tjera bileta këtë të enjte

Ceferin nënvlerësoi lojtarët që rendën drejt Arabisë për para, me kontratat milionëshe që i joshën.

"Ka lojtarë në fund të karrierës së tyre dhe të tjerë që nuk janë mjaftueshëm ambiciozë për të aspiruar të fitojnë gara të mëdha. Me sa di unë, Mbappe dhe Haaland nuk e ëndërrojnë Arabinë Saudite. Lojtarët më të mirë, në kulmin e karrierës së tyre, nuk mendoj se do të shkojnë në Arabinë Saudite. Kur njerëzit më tregojnë për lojtarët që kanë shkuar atje, askush nuk e di se ku luajnë", vijoi slloveni.

Për Ceferin, asnjë rregull i UEFA nuk do ndryshojë për të pranuar klube jo evropiane në kompeticionet e kontinentit të vjetër.

"Kjo është një temë që i intereson kryesisht mediave, jo aq komunitetit të futbollit evropian. Vetëm klubet evropiane mund të marrin pjesë në Champions League, Europa League ose Europa Conference League; vetëm federatat evropiane mund të aplikojnë për të pritur një finale. Ne do të duhet të ndryshojmë të gjitha rregullat tona dhe nuk kemi ndërmend ta bëjmë këtë", vijoi Ceferin.

S.DH/Shqiptarja.com

TAG:
• Aleksandër Ceferin
• uefa
• Arabia Saudite