TIRANE- Dhuna në futbollin shqiptar nuk ka të ndalur, por këtë herë është zhvendosur nga fusha e blertë në ambientet jashtë stadiumit ‘Qemal Stafa’ në përfundim të ndeshjes së vlefshme për javën e dytë të Kategorisë së Parë mes ekipit të Dinamos dhe Tërbunit.

Futbollisti i ekipit të Dinamos, Arbër Ajçe 21 vjeç, i cili në përfundim të ndeshjes, sapo ka dalë nga ambientet e stadiumit ka qëlluar më shqelma dhe me grushta një efektiv të policisë së kryeqytetit duke i shkaktuar disa fraktura në trup.

Efektivi ishte pjesë e grupit të shërbimit për mbarëvajtjen e ndeshjes. Menjëherë pas ngjarjes, policia është vënë në lëvizje për të arrestuar autorin.,Për habi të të gjithëve, në vendin e ngjarjes kanë qenë pak metra larg edhe shumë efektivë të tjerë të policisë, por që u ka shpëtuar nga vëmendja ngjarja.

Rastësisht në vendin e ngjarjes ka qenë edhe ministri i ardhshëm i Rendit, Saimir Tahiri, i cili i ka dhënë mbështjetje dhe ka kërkuar zbardhjen e menjëhershme të ngjarjes. Ndërkohë që policia është vendosur në ndjekje të Ajçes për ta arrestuar.

Kategoria e Parë, Java II

DINAMO-TERBUNI    1-1
LUFTETARI-ELBASANI   2-2
SHKUMBINI-KAMZA   2-0
ADA-APOLONIA   0-3
BURRELI-POGRADECI   3-2
TOMORI-MAMURRASI   1-0
BUTRINTI-HIMARA   3-0
VELECIKU-ALBPETROL   1-0

(Ne foto: Ndeshja sot Dinamo-Terbuni)
Redaksi Online
(d.b./mag/shqiptarja.com)