Lot, dhimbje e trishtim! Familja Tanushi hap dyert e mortit, në pritje të trupit të pajetë

Trupi i major Klodian Tanushit do të mbërrijë në Shqipëri mesin e javës së ardhshme. Procedurat mjekësore kërkojnë minimumi 72 orë, çka e bëjnë të pamundur ardhjen e trupit para ditës së martë. Tanushi do niset në Shqipëri me avion ushtarak, njësoj si kolegia e tij e ndjerë Zarife Hasanaj. Ai do të shpallet dëshmor, ku do të zhvillohet edhe ceremonia dhe do t'i bëhen të gjitha nderimet, si një i rënë në detyrë në emër të atdheut.

Major Klodian Tanushi ndërroi jetë ditën e djeshme në Letoni pasi nuk mund t'i mbijetonte plagëve të marra nga shpërthimi i municioneve, si pasojë e së cilit ndërroi jetë edhe nëntetarja Zarife Hasanaj.

Ai ishte pjesë e misionit i cili do përfundonte në muajin Maj, por për fat të keq, do kthehet pranë familjes i vdekur për t'u prerë në varrezët e dëshmorëve pranë nëntetares Zarife Hasanaj. Gjatë karrierës së tij ai ka mbajtur detyra të rëndësishme dhe gjatë misionit të tij në Letoni kishte edhe zyrën e tij në ambientet e së cilës përveç flamurit të NATO-s mbante edhe flamurin shqiptar.

Në 10-vjetorin e anëtarësimit të Shqipërisë në NATO ai ka përcjellë edhe një urim duke përmendur edhe detyrat e kontigjentit ku ai bënte pjesë.

"Kontigjenti i katërt, me mision në kuadër të aleancës së atlantikut të veriut në Letoni është i përbërë  nga 21 ushtarakë të cilët kryejnë detyra të ndryshme në shtabin e brigadës letoneze, në shtabin e grup batalionit. Misioni është të mbështesë të gjithë elementët EOD, ku kryhen detyra të ndryshme si asgjësimi logjistik i municioneve , asgjësimi i municioneve të rënda konvencionale, asgjësimi i paisjeve të rënda të improvizuara, pastrimin e zonëve të infektuara, si dhe njohja e municioneve të NATO-s . Urime Shqipëri 10-vjetorin në NATO", shprehet Tanushi në videomesazhin e tij.