Ish-ministri i Drejtësisë dhe një nga figurat më të rëndësishme të LSI-së, Ylli Manjani me anë të një reagim të bërë publik në rrjetet sociale ka bërë thirrje që opozita të futet në zgjedhje pasi sipas tij do të fitojë shumicën e Bashkive.

Sipas Manjanit opozita duhet të konsiderojë seriozisht opsionin e hyrjes në zgjedhje, kjo qoftë edhe me shtyrjen e zgjedhjeve sa për të lejuar KQZ të bëjë rregjistrimet.

Më pas ish-ministri i LSI-së ka thënë se 'kokëfortësia' e opozitës për të mos shkuar në zgjedhje mund të sjellë dhunë dhe përplasje dhe këtë nuk e do askush.

Mesa duket partia e dytë më e madhe e opozitës jashtëparalmentare, LSI ka shtrirë dorën për gjetjen e një zgjidhje. Kujtojmë se kohët e fundit edhe kryetarja e LSI-së, Monika Kryemadhi ka ulur tonet dhe ka bërë thirrje për paqe dhe jo dhunë. Me anë të një shkrimi që shpjegonte operacionin e kaluar ajo bënte thirrje kryeministrit Rama duke thënë se nuk ishte asgjë personale por vetëm një betejë politike.

Ndërkohë vetë Manjani shprehet se Rama duhet mundur në pushtet.

Postimi i plotë i Manjanit:

“Nëse opozita hyn tani në zgjedhje, pa fushatë fare fiton bindshëm në: Shkodër, Lezhë, Kukës, Bulqizë, Mat, Laç, Kamëz, Vorë, Cërrik, Sarandë, Delvinë, Rrogozhinë, Kavajë, Çorovodë, Finiq, Tropojë, Konispol e Pustec. Me një kandidat të mirë dhe me pak fushatë fiton: Elbasanin, Tiranën (me pak vota diferencë), Hasin, Pukën, Dibrën, Krujën, Mallakastrën, Korçën, Kuçovën, Urën Vajgurore, Selenicën, Peqinin, Përmetin dhe Këlcyrën.

Kjo është bindja ime e mbështetur edhe në sondazhin e IPR Marketing. Por kushti është që opozita të jetë unike dhe e organizuar mirë në terren. Prandaj Rama nuk ka interes të dialogojë për të lejuar Opozitën të konkurrojë se është HUMBËS! Ndoshta vërtetë opozita duhet të konsiderojë opsionin hyrje në zgjedhje, qoftë dhe me një shtyrje minimale të datës së zgjedhjeve, sa për të lejuar KQZ të bëjë rregjistrimet dhe përgatitjen e infrastrukrurës zgjedhore…

Ndoshta, them me kaq informacion sa kam nga lajmet. Por edhe nga ndjesia e përgjithshme që ekziston nga frika e përplasjeve të dhunshme. Dhuna nuk pranohet nga askush! Deri më sot monopolin e dhunës e ka qeveria, e cila po bën çmos t’ja kalojë opozitës. Nga ana tjetër, opsioni që të ikë Rama që të fitohen zgjedhjet më duket i drejtë, por jo i dëshiruari. Edi Rama duhet mundur në pushtet, aty ku është, tani në zgjedhje lokale dhe pak më vonë në zgjedhjet politike… Jam i bindur se është plotësisht e mundshme që të mundet megjithë potencialin kriminal, financiar e propagandistik që ka! Jam i bindur sepse ka kaluar çdo limit konsumi dhe arroganca e tij është gropa politike që i ka hapur vetes. Por mendim e kam këtë që sapo shkrova. Mbase shërben ndokund…”, shkruan Manjani.