Lufta/ Largohet nga Gaza grupi i tretë i pengjeve, më e vogla 4 vjeç! Izraeli liron 39 të burgosur palestinezë! Netanyahu: Mund të zgjatet armëpushimi

Kryeministri izraelit Benjamin Netanyahu tha këtë mbrëmje se ekziston një mundësi për marrëveshje për zgjatjen e armëpushimit në Gaza.

"I thashë Presidentit Biden, ekziston një plan marrëveshjeje, ai parashikon lirimin e 10 pengjeve për çdo ditë shtesë armëpushimi”.

“Por thashë gjithashtu – saktësova se në fund të atij plani do të rifillojmë me të gjitha forcat tona për të arritur objektivat e luftës”. 

Hamasi ka kërkuar zgjatjen e armëpushimit në Gaza, një veprim që mund të rrisë numrin e pengjeve që mund të lirohen.

Sipas marrëveshjes aktuale, dita e fundit e armëpushimit është e hëna. Në një deklaratë për mediat, Hamasi thotë se “po kërkon të zgjasë armëpushimin pas përfundimit të katër ditëve përmes përpjekjeve serioze për të rritur numrin e pengjeve të liruar siç përcaktohet në marrëveshjen e armëpushimit humanitar”.

Të afërm të pengjeve të Hamasit të cilët janë lënë të lirë më herët, dëshmuan se familjarët e tyre ishin mbajtur totalisht të izoluar. New York Times, citon një një nënë të liruar në Gaza me djalin e saj të vogël se ata kishin fjetur në karrige. Një 85-vjeçare nga një familje tjetër tha se teksa mbaheshin peng gati kishin humbur sensin e kohës. Vetë pengjet nuk kanë folur drejtpërdrejt pasi shumica ndodhen në spitale ndërkohë që informacionet rreth tyre janë të klasifikuara nga Izraeli.

Megjithatë detaje nga periudha e mbajtjes së tyre në privim të lirisë janë mësuar nga të afërmit. Ata kanë thënë se pasi takuan të afërmit e tyre, panë se ishin kthyer më të dobët se më parë.

"Ata janë ushqyer, por jo rregullisht dhe jo gjatë gjithë kohës" tha Merav Mor Raviv, një kushëri i Keren Munder, 54 vjeç, e cila u lirua të premten së bashku me djalin e saj, 9 vjeç.

Pengjet ishin ushqyer kryesisht me oriz dhe me bukë tha Raviv, duke shtuar se të afërmit e saj kishin humbur rreth 6 deri në 8 kilogramë gjatë kohës që u mbajtën nga Hamasi. Ata kishin fjetur në një dhomë në “krevate” të improvizuar duke bashkuar tri karrige.

"Dera e dhomës ishte e mbyllur dhe kur ata donin të shkonin në tualet, duhej të trokisnin dhe të prisnin - ndonjëherë deri në dy orë derisa porta të hapej". Mediat citojnë se aq të izoluar kanë qenë pengjet saqë kanë mësuar për humbjen e të afërmve në luftë vetëm pasi janë liruar.

Shtatëmbëdhjetë pengje u dorëzuan nga Hamasi në Kryqin e Kuq në ditën e tretë të armëpushimit me Izraelin. 14 ishin izraelitë, përfshirë 9 fëmijë dhe 4 tajlandezë. Pas lirimit të pengjeve qeveria egjiptiane ka njoftuar se rreth 120 kamionë që transportonin ndihma humanitare, kanë hyrë në Gaza.

Një grup të burgosurish palestinezë janë liruar nga Izraeli si pjesë e marrëveshjes së armëpushimit.

Mësohet se janë liruar 39 të burgosur. Një ekip i Sky Neës ka parë autobusët duke dalë nga burgu ushtarak Ofer.

Gjatë armëpushimit në Gaza, duke përfituar nga situata e qetë, disa gazetarë janë kthyer në spitalin Al-Shifa, dhe kanë filmuar kushtet me të cilat përballet aktualisht spitali.

Pamjet e publikura janë trishtuese dhe tregojnë qartë mjerimin në të cilin ndodhet Al-Shifa.

Hamasi ka konfirmuar sot vrasjen e 4 komandatëve të grupit përfshirë edhe kreun e Brigadës veriure, Ahmed Ghandour.

Nga ana tjetër forcat izraelite bënë me dije se kanë sekuestruar më shumë se 1.3 milionë dollarë para në dorë nga shtëpitë e terroristëve dhe bastionet e Hamasit në Gaza.

“Paratë e gatshme u sekuestruan dhe do t'i "konfiskohen shtetit", shtoi ministria e Mbrojtjes së Izraelit.

Përpara se ta rrëmbenin Mia Regev, milicia e Hamasit e qëlloi atë më 7 tetor.

Kështu vajza 21-vjeçare izraelite ishte duke ecur me paterica kur u lirua orët e fundit. Kjo u pa në videon e lirimit të publikuar nga Hamasi dhe për shkak të kushteve të saj shëndetësore, sqarojnë burimet izraelite, ajo u transferua në spitalin e Sorokas, pasi ishte e vetmja nga 13 pengjet e liruar dje që kishte nevojë për trajtim urgjent.

Mia Regev do t'i nënshtrohet një operacioni sot. Megjithatë, Ministria izraelite e Shëndetësisë saktëson se “gjendja shëndetësore e të resë është e qëndrueshme pas 7 javësh robëri”.