BERAT- Ministri i Brendshëm Sandër Lleshaj ka pasur kritika për punën e bërë nga Komisariati i Skraparit në luftën ndaj kanabisit. Ai tha se në këtë zonë ka pasur një shtim të parcelave me kanabis dhe ky problem është evidentuar nga Policia e Shtetit dhe jo Komisariati i Skraparit. Mbi të gjitha ai ka thënë se ka pasur efektivë të implikuar. 

"Probleme të shtuara në lidhje me këtë fenomen të kultivimit të narkotikëve kemi pasur në zonën e Skraparit dhe këto probleme janë evidentuar nga DPV-ja e Beratit dhe jo nga Komisariati i Policisë Skrapar. Ne kemi vërejtje për efektivët e policisë Skrapar, ku kemi dhënë vërejtje pasi ka pasur implikime në nivele të ndryshme"-ka thënë Lleshaj.

Pas takimit të zhvilluar me dyer të mbyllura brenda Drejtorisë së Policisë Vendore në Berat, ministri Lleshaj pari edhe një paralajmërim për ata që e mendojnë të kultivojnë kanabis.

"Për ata që i gënjen mendja se mund të përfshihen në veprimtarinë kriminale të kultivimit të lëndëve narkotike, ta harrojnë, ne do ti godasim me struktura të mirëorganizuara"-ka thënë Lleshaj. 

Lleshaj ishte në Berat për analizën e punës së Policisë së Shtetit kundër kultivimit të kanabisit. Më herët ai ka qenë në qytetin e Shkodrës, ku ka deklaruar se kanabisi do të asgjësohet para fushatës që krimi të mos ndërhyjë në zgjedhjet e 25 prillit.