Lufta në Gaza/ Armëpushimi nis 3 orë me vonesë, Hamasi publikon emrat e 3 pengjeve që do lirohen sot! Izraeli do nxjerrë nga burgu 90 palestineze

Lufta gati 15-mujore në Gaza mes Izraelit dhe Hamasit është ndalur këtë të dielë pas hyrjes në fuqi zyrtarisht të armëpushimit mes palëve. Faza e parë e marrëveshjes parashikon nisjen e lirimit të të paktën 33 pengjeve izraelite nga Hamasi dhe më pas Izraeli do të lirojë mijëra të burgosur palestinezë. 

Marrëveshja e armëpushimit u fut në fuqi pas gati tre orësh vonesë, pasi Hamasi nuk publikoi në kohë listën e emrave me pengjet që do të liroheshin, që sipas marrëveshjes duhet të ndodhë 24 orë para shkëmbimit.

Hamasi tashmë ka publikuar emrat e tre pengjeve gra që pritet të lirohen, Romi Gonen, Emily Damari dhe Doron Steinbrecher. Bëhet fjalë për një infermiere veterinare 30 vjeçare, një vajzë 24 vjeçare e rrëmbyer në Festivalin Nova dhe një vajzë 28 vjeçare me shtetësi edhe britanike. Sipas mediave, nga ana tjetër Izraeli do të lirojë 90 gra palestineze të burgosura.

Hamasi tha se nuk e kishte bërë gati listën me emrat e pengjeve, për shkak të "arsyeve teknike në terren". Ndërkohë, që prej orës 07:30 trupat izraelite kishin filluar të tërhiqeshin nga Gaza, pas marrëveshjes së arritur në Doha. Automjetet e IDF u panë duke u larguar nga Rafah përmes korridorit të Filadelfias, i cili shtrihet përgjatë kufirit jugor me Egjiptin. 

Por, ndërsa Hamasi ende s’kishte publikuar listën me emrat e pengjeve, ushtria izraelite vijoi sulmet në Gaza duke vrarë 8 persona dhe plagosur 25 të tjerë. Netanyahu ka thënë se sipas marrëveshjes Izraelit i lind e drejta të rifillojë luftën në rast të mos zbatimit të saj nga Hamasi në termat e rëna dakord.

Presidenti amerikan Biden vetëm pak ditë më parë tha se palët pas fazës së parë të armëpushimit duhet të vijojnë negociatat për mbylljen përfundimtare të luftës kohë gjatë së cilës duhet të qëndrojnë në armëpushim. 

Lufta në Gaza ka shkaktuar viktima të shumta dhe dëme të mëdha materiale, ku si pasojë e ofensivës izraelite janë vrarë më shumë se 46.000 palestinezë, ndërsa mbi 90 për qind e popullsisë prej 2.3 milionë banorësh është zhvendosur.

Marrëveshja mes Izraelit e Hamasit

Armëpushimi, që u arrit pas një viti të ndërmjetësimit intensiv nga SHBA-ja, Katari dhe Egjipti, është i dyti që hyn në fuqi që kur nisi lufta në tetorin e vitit 2023, pasi mbi një vit më parë palët kishin ndalur luftimet për një javë dhe gjatë asaj periudhe u liruan disa pengje. Negociatat e ndërmjetësuara nga Egjipti, Katari dhe Shtetet e Bashkuara erdhën pak përpara inaugurimit të Presidentit të zgjedhur të SHBA-së, Donald Trump, më 20 janar .

Faza e parë e saj do të zgjasë gjashtë javë, gjatë së cilës 33 nga 98 pengjet e mbetura - gra, fëmijë, burra mbi 50 vjeç, të sëmurë dhe të plagosur - do të lirohen në këmbim të gati 2,000 të burgosurve dhe të paraburgosurve palestinezë.

Gjatë fazës së parë, ushtria izraelite do të tërhiqet nga disa nga pozicionet e saj në Gaza dhe palestinezët e zhvendosur nga zonat në veri të Gazës do të lejohen të kthehen.

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• marreveshja izrael hamas
• rripi i gazes
• Izrael
• Hamas
• lufta ne rripin e gazes