Ka nisur në Moskë takimi mes presidentit rus Vladimir Putin dhe dy të dërguarve të presidentit amerikan Donald Trump, Steve Witkoff dhe Jared Kushner. Lajmi është konfirmuar nga Kremlini, i cituar nga mediat shtetërore ruse, sipas të cilit bisedimet janë aktualisht në zhvillim.

Steve Witkoff, i dërguari special amerikan, dhe Jared Kushner, dhëndri i Donald Trump, mbërritën mbrëmjen e sotme në Moskë për bisedime me presidentin rus mbi një plan të hartuar nga Shtetet e Bashkuara për t’i dhënë fund luftës në Ukrainë. 

Agjencia ruse TASS raportoi se kjo është vizita e shtatë e Steve Witkoff në Rusi brenda më pak se një viti.

Ndërkohë, mediat raportojnë se Ukraina dhe Shtetet e Bashkuara po diskutojnë një propozim për t’ia paraqitur Rusisë, që parashikon një armëpushim të kufizuar në sektorin energjetik. Sipas Ukrainska Pravda, që citon Financial Times, plani do të përfshinte ndalimin e sulmeve ndaj infrastrukturës energjetike ukrainase nga Rusia, në këmbim të ndalimit nga ana e Kievit të sulmeve ndaj rafinerive ruse të naftës dhe cisternave të ashtuquajturës “flotë hije”.

Në këtë kuadër, përmendet edhe mundësia e një formati negociatash trilaterale Ukrainë–Rusi–SHBA, të ngjashëm me bisedimet e zhvilluara në Abu Dhabi në nëntor të vitit të kaluar, ku negociatorët ukrainas dhe rusë u takuan veçmas me përfaqësuesit amerikanë, pa kontakte të drejtpërdrejta mes tyre.

Megjithatë, burime të Financial Times shprehen skeptike për suksesin e kësaj nisme. Sipas tyre, negociatat nuk janë në një fazë të avancuar dhe është e pamundur që Vladimir Putin ta pranojë një armëpushim energjetik, pasi presioni mbi infrastrukturën energjetike të Ukrainës shihet nga Kremlini si një mjet i rëndësishëm ndikimi.

Nga ana tjetër, edhe Ukraina shfaq rezerva ndaj një marrëveshjeje të tillë. Një zyrtar i lartë ukrainas ka deklaruar se programi i dronëve me rreze të gjatë ka goditur me sukses objektiva strategjikë rusë të naftës dhe gazit, si edhe cisternat e “flotës hije”, duke e bërë Kievin të hezitojë për një ndalim të këtyre operacioneve.