Lufta/ Zelensky gati të ndryshojë ministrin e Mbrojtjes! Kiev: Nuk do i përdorim raketat amerikane kundër Rusisë

Papa Françesku ka folur për mediat pas vizitës së tij në Sudanin e Jugut. Teksa foli për luftën në Ukrainë, Papa tha se është i gatshëm të takohet me dy presidentët e Ukrainës dhe të Rusisë për të arritur një marrëveshje që t’i japë fund luftës.

Ai zbuloi edhe vizitën e tij në ambasadën ruse në Vatikan në përpjekje për të siguruar një takim me Vladimir Putin në ditën e dytë të luftës në Ukrainë.

“Jam i hapur për të takuar të dy presidentët e Ukrainës dhe Rusisë. Unë nuk shkova në Kiev sepse nuk ishte e mundur të shkoja për momentin. Në ditën e dytë të luftës shkova në ambasadën ruse, doja të shkoja në Moskë për të biseduar me Putinin dhe më dukej një mundësi e vogël, atëherë ministri Lavrov më tha do të shohim, më vonë”-u shpreh Papa Françesku.

Shefi i inteligjencës ushtarake Kyrylo Budanov do të zëvendësojë Oleksiy Reznikov si ministër i mbrojtjes i Ukrainës . Kjo u konfirmua në Telegram nga Davyd Arakhamia , një deputet nga partia 'Shërbëtori i Popullit' e Presidentit Volodymyr Zelensky .

Mercenari i grupit Wanger, Igor Mangushev u qëllua në kokë në Ukrainën lindore, pasi ai pretendoi se kishte shpikur simbolin 'Z' dhe e kishte asimiluar atë me luftën në Ukrainë. Ish-agjenti i FSB-së dhe ish-kapiteni i ushtrisë ruse u transferua në spitalin Stakhanov me një plagë në kokë dhe imazhe që qarkulluan në mediat sociale që e tregonin atë të plagosur. Sipas analistëve, sulmi ndaj Mangushev është një paralajmërim drejtuar themeluesit dhe udhëheqësit të grupit Wagner, Yevgeniy Prigozhin .

Ministri ukrainas i Mbrojtjes, Oleksii Reznikov , ka premtuar kontrolle pas skandalit të manipulimit tw tenderave që goditi departamentin e tij, në mes të pushtimit rus. Reznikov foli për këtë gjatë një konference për shtyp.

Duke pranuar se shërbimet anti-korrupsion të ministrisë së tij kanë dështuar në detyrat e tyre, ministri siguroi se ishte nisur një auditim i brendshëm i të gjitha kontratave publike dhe gjithashtu premtoi një auditim të asistencës teknike ndërkombëtare, pwr armët që Kievi vazhdon të marrë nga perendimi.

Mediat ukrainase kanë raportuar se presidenti ukrainas Volodymyr Zelensky mund të shkarkojë Reznikov nga detyra javën e ardhshme dhe ta zëvendësojë atë me Kirill Budanov . 

Ukraina nuk do të përdorë armë me rreze të gjatë të premtuara nga SHBA për të goditur territorin rus dhe do të synojë vetëm njësitë ruse në territorin e pushtuar ukrainas. Këtë e ka siguruar ministri ukrainas i mbrojtjes Oleksii Reznikov.

"Ne gjithmonë u themi zyrtarisht partnerëve tanë se nuk do të përdorim armët e furnizuara nga partnerët e huaj për të qëlluar në territorin rus. Ne gjuajmë vetëm mbi njësitë ruse në territorin ukrainas të pushtuar përkohësisht," tha Reznikov në një konferencë për shtyp.

SHBA ka konfirmuar se raketat me rreze veprimi prej 150 km janë në paketën e re të ndihmës ushtarake për Kievin.

Ushtria ukrainase ka thënë se 131.290 pjesëtarë të ushtrisë ruse mund të kenë vdekur në Ukrainë, prej nisjes së luftës më 24 shkurt të vitit të kaluar. Në përditësimin e tij të rregullt, Shtabi i Përgjithshëm i ushtrisë ukrainase ka pretenduar se 700 ushtarë rusë janë vrarë vetëm një ditë më parë.

Në këto përditësime – në të cilat shifrat për viktimat janë më të larta sesa ato që i përpilon Perëndimi – është thënë po ashtu se Rusia ka humbur 3.220 tanke, 6.405 pajisje të armatosura dhe 2.226 sisteme të artilerisë prej nisjes së luftës. Duke cituar zyrtarë amerikanë dhe ata të Perëndimit, e përditshmja amerikane, New York Times, ka raportuar më herët gjatë këtij muaji se numri i ushtarëve rusë të vrarë dhe të plagosur i afrohet shifrës 200.000.

Për luftime të ashpra është raportuar edhe më 5 shkurt në Bahmut, qytet në lindje të Ukrainës, për kontrollin e të cilit ushtritë janë duke luftuar që disa muaj. Presidenti ukrainas, Volodymyr Zelensky, ka thënë më 3 shkurt se forcat ukrainase do të luftojnë për Bahmutin “aq sa të munden”.

Ministria britanike e Mbrojtjes ka thënë javën e kaluar se Rusia ka bërë avancime të vogla në tentimet për të rrethuar Bahmutin. Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

Në zonën veriore të Bakhmutit në Ukrainë, "lufta e ashpër po zhvillohet për çdo rrugë, shtëpi, shkallë" dhe "ukrainasit nuk po tërhiqen askund". Këtë e ka bërë të ditur themeluesi i kompanisë mercenare Wagner, Yevgeni Prigozhin, duke mohuar raportimet e qarkulluara në mediat ruse sipas të cilave trupat e Kievit janë në tërheqje nga qyteti në Donbass.

 "Ata po luftojnë deri në fund," përsëriti ai.

"Unë po sqaroj situatën - shtoi ai në një shënim të raportuar nga Tass -. Forcat e armatosura ukrainase nuk po tërhiqen. Ata po luftojnë deri në hendekun e fundit. Në lagjet veriore të Bakhmutit ka luftime të ashpra për çdo rrugë, çdo shtëpi”, tha ai. “Sigurisht, është mirë që mediat shpresojnë në tërheqjen e ukrainasve, por kjo nuk ndodh në lagjet veriore, jugore apo lindore”, përfundoi ai.

Të premten, presidenti ukrainas, Volodymyr Zelensky, siguroi se ushtarët e tij do të luftonin për aq kohë sa të mundeshin, por gjithashtu pranoi se situata po ashpërsohej. Ditët e fundit kanë mbërritur përforcime për trupat ruse të grumbulluara rreth qytetit. Në rast të një pushtimi, do të ishte objektivi i parë strategjik madhor i arritur nga ushtarët e Moskës që nga vera.

Rreth 40 për qind e qytetarëve të Odesës në Ukrainën jugore nuk kanë energji elektrike. Kështu deklaroi kryeministri i Ukrainës Denys Shmygal duke shpjeguar se në qytet janë dërguar gjeneratorë të energjisë. "Në qytet, deri në 40% e konsumatorëve (ekuivalente me 280,000 njerëz) janë ende pa energji elektrike. Si rezultat, gjeneratorë të fuqishëm janë dërguar në Odessa për të ndihmuar në furnizimin me infrastrukturën kritike dhe për të lidhur më shumë konsumatorë me energjinë elektrike.”- thuhet në njoftim.

Ministri ukrainas i Mbrojtjes Oleksii Reznikov ka të ngjarë të lirohet nga posti i tij javën e ardhshme. Kjo është raportuar nga Ukrainska Pravda duke cituar burime qeveritare dhe ushtarake. Zëvendësuesi i mundshëm i Reznikov mund të jetë Kyrylo Budanov, kreu i agjencisë së inteligjencës ushtarake të Ukrainës.

Në fund të janarit, ministria e mbrojtjes u përfshi në një skandal korrupsioni që çoi në shkarkimin e disa zyrtarëve të lartë. Një burim qeveritar konfirmoi për Kyiv Independent se Reznikov do të zëvendësohet së shpejti. Ministri aktual i mbrojtjes mund të marrë një punë të re si ministër i drejtësisë.

Gati një vit pas luftës në Ukrainë, ish kryeministri izraelit Naftali Benet ka dalë me një dekaratë të pazakontë lidhur me Presidentin Vladimir Putin.

Presidenti rus Vladimir Putin premtoi se nuk do të vriste homologun e tij ukrainas, Volodymyr Zelensky, kur u takua me ish-kryeministrin izraelit, Naftali Bennett vitin e kaluar në ditët e para të luftës.

“A keni ndërmend të vrisni Zelenskyn?”

Kjo ishte pyetja që Bennett i kishte drejtuar Putinit, të cilën e tregoi gjatë një interviste gati pesë orëshe që dha për “Channel 12” të Izraelit.

Në atë bisedë, ai tregoi detaje nga udhëtimi i tij i njohur në Moskë në Shabbat në fillim të marsit 2022, në një përpjekje për të ndihmuar ndërmjetësimin e një marrëveshjeje paqeje midis dy palëve.

Ndërsa Bennett nuk ishte në gjendje të ndihmonte në përfundimin e armiqësive, ai ishte në gjendje të siguronte një zotim nga Putini për të mos vrarë Zelenskyn, i cili në atë kohë fshihej në një bunker sekret për të parandaluar një vrasje të tillë. Putin e siguroi Bennett se nuk do ta vriste.

“Duhet të kuptoj që po më jepni fjalën tuaj se nuk do ta vrisni Zelenskyn”- kishte thënë ish-kryeministri izraelit dhe Putin përsëri premtoi të mos e bëjë këtë.

Bennett i telefonoi Zelenskyt ndërsa ai ishte ende në Moskë në rrugën e tij për në aeroport nga Kremlini për t’i thënë se ai nuk ishte nën kërcënim me vdekje.

"Putini nuk më kërcënoi mua dhe as Gjermaninë. Por gjatë bisedave tona telefonike, qëndrimet tona shumë të ndryshme për luftën në Ukrainë janë shumë të qarta." Kështu deklaroi kancelari gjerman Olaf Scholz në një intervistë për Bild am Sonntag, duke shpjeguar se i kishte thënë presidentit Vladimir Putin "se Rusia është e vetmja përgjegjëse për luftën.

Rusia ka pushtuar vendin fqinj për të marrë nën kontroll pjesë të Ukrainës ose të vendit". "Nuk mund ta pranojmë, sepse cenon paqen evropiane. Kjo është arsyeja pse ne mbështesim Ukrainën financiarisht, humanitarisht dhe gjithashtu me armë," shtoi ai.